प्रभात वृत्तसेवा
पुणे – दिलेली जबाबदारी सक्षमपणे न पाळणाऱ्या अधिकाऱ्यांना निलंबनानंतर पुन्हा त्याच जागेवर नियुक्त करणे, म्हणजे त्यांच्यावर कारवाई न करता त्यांच्या चुकांवर पांघरून घालण्यासारखे आहे. यापुढे गंभीर चुका करणाऱ्या अधिकाऱ्यांची गय केली जाणार नसून त्यांच्यावर तात्काळ कारवाई करण्याचे निर्देश राज्याचे परिवहन मंत्री आणि महाराष्ट्र राज्य रस्ते परिवहन महामंडळाचे अध्यक्ष प्रताप सरनाईक यांनी सोमवारी दिले. पुणे दौऱ्यावर असलेल्या सरनाईकांनी महामंडळाच्या विविध स्थानकांना भेट दिली. त्यात त्यांनी पुण्यातील स्वारगेट स्थानकाला भेट दिल्यानंतर ते बोलत होते.

परिवहन मंत्री म्हणाले, की या फेब्रुवारीमध्ये स्वारगेट स्थानकावर घडलेल्या दुर्दैवी घटनेनंतर सर्व राज्य हादरून गेले. त्या घटनेननंतर महामंडळाच्या काही वरिष्ठ अधिकाऱ्यांवर कारवाई करत बदली करण्यात आली होती, तर स्वारगेट बसस्थानकाचे वरिष्ठ आगार व्यवस्थापक, कनिष्ठ आगार व्यवस्थापक व दोन सहायक वाहतूक अधीक्षकांना निलंबित करून विभागीय चौकशी करण्याचे आदेश दिले होते. याबाबत मी स्वतः विधानभवनात निवेदन दिले होते. त्यानंतर हे अधिकारी दोषी आढळल्यास त्यांच्यावर कारवाई अपेक्षित होती.

तत्पूर्वी विभागीय चौकशी निष्पक्ष होण्यासाठी त्यांची इतर ठिकाणी बदली होणे आवश्‍यक होते. मात्र, प्रादेशिक व्यवस्थापकांनी त्यांची बदली न करता स्वारगेटमध्येच या अधिकाऱ्यांना नियुक्ती दिली. हे वर्तन नियमाला धरून नसून आपण दोषींना पाठीशी घालत असल्याचा संदेश समाजात गेला. सोबतच विधिमंडळात मी दिलेल्या आश्‍वासनाची फसवणूक झाली आहे.

त्यामुळे संबंधित अधिकाऱ्यांवर कारणे दाखला नोटीस बजावण्यात आली असून, स्वारगेट स्थानकावर नियुक्ती दिलेल्या अधिकाऱ्यांची बदली करण्यात आली आहे, असेही सरनाईक यांनी सांगितले.या वेळी सरनाईक यांनी स्वारगेट बसस्थानकावरील प्रवासी प्रतीक्षालय, स्वच्छतागृह, चालक – वाहक विश्रांतीगृह इत्यादींची पाहणी केली आणि प्रवासी व कर्मचाऱ्यांशी संवाद साधला.