प्रभात वृत्तसेवा
पुणे : नवरात्री पाठोपाठ येणारी दिवाळी आणि पालिकेची निवडणूक लक्षात घेता चमकोगिरी करणारे मोठ्या प्रमाणावर सक्रिय झाले आहे. या फलकांवर पालिकेचा आकाशचिन्ह विभाग कारवाई करत असला तरी याबाबत दुजाभाव केला जात असल्याचे स्पष्ट होत आहे. शहर विद्रूप करणारे कार्यकर्त्यांचे फलक काढले जात असले तरी आमदार तसेच राजकीय पक्षांचे पदाधिकारी असलेल्या नेत्यांचे फलक मात्र तसेच ठेवले आहेत. त्यामुळे पालिकेच्या कारभारावर प्रश्नचिन्ह उपस्थित होत आहे.

पालिकेच्या निवडणुकीमुळे चमकोगिरी करणाऱ्यांकडून नवरात्रीच्या कालावधीत जागा मिळेल तिथे जाहिरात फलक लावण्यात आले होते. आठवडाभर मोठया प्रमाणावर जाहिरातबाजी झाल्यानंतर राजकीय रोष टाळण्यासाठी पालिकेने गुरूवारी रात्रीपासून अनधिकृत फ्लेक्स, बोर्ड, बॅनरवर कारवाई सुरूकेल्याचे आकाशचिन्ह विभागाचे उपायुक्त माधव जगताप यांनी सांगितले. ही कारवाई शुक्रवारी पहाटेपासून सुरू करत १५ क्षेत्रीय कार्यालयांच्या हद्दीतील अनधिकृत फ्लेक्स, बोर्ड, बॅनर हटवण्यात आले. दिवसभर ही कारवाई सुरू राहणार असून, पुढील काळात आढळणाऱ्या अनधिकृत फ्लेक्स, बोर्ड, बॅनर लावणाऱ्यांविरोधात गुन्हे दाखल करून दंडात्मक कारवाई केली जाणार असल्याचेही जगताप यांनी स्पष्ट केले.

आमदारांसाठी पायघडया..
पालिका निवडणुकीसाठी इच्छूक असल्याने अनेक कार्यकर्त्यांनी आमदारांच्या नावाने फलक लावले आहेत. मात्र,या फलकांना हात लावण्याची तसदी पालिकेच्या आकाशचिन्ह विभागाने घेतलेली नाही. प्रामुख्याने शिवाजीनगर, खडकवासला, वडगावशेरी, पर्वती, कोथरूड भागात मोठया प्रमाणावर भर चौकात पालिकेच्या पथ दिव्यांवर फलक लावलेले आहेत.

अनेक ठिकाणी फलकांनी वाहतुकीचे सिग्नलही अडविले आहेत. विशेष म्हणजे मुख्य रस्त्यांवर आणि मुख्य चौकात हे फलक असून त्या ठिकाणी इतर जाहिरात फलक हटविले असले तरी आमदारांच्या फलकांना मात्र हातही लावलेला नाही. त्यामुळे, महापालिकाच या कारवाईत दुजाभाव करून विद्रूपीकरणास हातभार लावत असल्याचे चित्र आहे.