प्रभात वृत्तसेवा
पुणे : आगामी महापालिका निवडणुकीसाठी प्रशासनास तब्बल २४ हजार कर्मचाऱ्यांची आवश्यकता भासत आहे. आतापर्यंत प्रशासनाने १९ हजार कर्मचाऱ्यांची माहिती संकलित केली आहे. शहरात ३ हजार वेगवेगळया प्रकारच्या शासकीय आस्थापना असून त्यांच्याकडील कर्मचाऱ्यांची माहिती संकलीत करण्यात येत आहे. निवडणुकांसाठी आता न्यायालयानेच मुदत निश्चित करून दिल्याने पालिकेकडून युध्द पातळीवर निवडणुकांची पूर्वतयारी करण्यात येत आहे.

मुदत संपल्यावर पालिकेच्या निवडणुका मार्च २०२२ मध्ये होणे गरजेचे होते. लांबलेल्या निवडणुका आता होऊ घातल्या आहेत. दरम्यानच्या काळात आता शहरात नव्याने २३ गावांचाही समावेश झाला. त्यानुसार, १६५ नगरसेवकांसाठीची ४ सदस्यांची प्रारूप प्रभाग रचना जाहीर झालेली असून त्यावरील सुनावणीनंतर ती अंतिम मान्यतेसाठी शासनास सादर केली आहे. या निवडणुकीसाठी प्रशासनाने विभागीय आयुक्तांकडे १७ निवडणूक अधिकारी तसेच १७ सहायक निवडणूक अधिकाऱ्यांची मागणी केली आहे. कर्मचाऱ्यांची जुळवाजुळव सुरू केली आहे.

नुकत्याच झालेल्या विधानसभा निवडणुकीसाठी शहरात ३,४३१ मतदान केंद्रे होती. महापालिकेने केलेल्या सर्वेक्षणात तसेच मतदारांच्या संख्येनुसार या केंद्राची संख्या ४, ४९० पर्यंत जाण्याची शक्यता आहे. त्यासाठी केंद्र निश्चिती आणि सुविधा उपलब्ध करून देण्यासाठी क्षेत्रीय अधिकाऱ्यांना नोडल ऑफिसर म्हणून नियुक्त केले असून त्यांच्याकडून केंद्राची पहाणी तसेच सुविधांचा अहवालही तयार झाल्याचे निवडणूक विभागाने स्पष्ट केले.