प्रभात वृत्तसेवा पुणे – नगरपरिषद व नगरपंचायत समितीच्या निवडणुकीसाठी उमेदवारांनी फ्लेक्स लावताना संबधित जागा मालक आणि नियोजन प्राधिकरणाची परवानगी घेणे बंधनकारक असल्याचे जिल्हा प्रशासनाने स्पष्ट केले आहे.उमेदवारी अर्ज भरतेवेळी निवडणूक निर्णय अधिकाऱ्यांच्या कार्यालयात वाहनांच्या ताफ्यामध्ये तीनपेक्षा जास्त मोटारगाड्या, वाहनांचा समावेश नसावा, तसेच अधिकाऱ्यांच्या दालनात पाच व्यक्ती उपस्थित राहतील. याव्यतिरिक्त कोणालाही प्रवेश दिला जाणार नाही, तसेच कार्यालयाच्या परिसरात नामनिर्देशनपत्र दाखल करतेवेळी मिरवणूक, सभा घेणे, घोषणा देणे, वाद्य वाजविणे किंवा गाणी म्हणणे आणि प्रचार करण्यासही जिल्हा प्रशासनाने निर्बंध घातले आहेत. जिल्ह्यातील धार्मिक स्थळे, रुग्णालये, शैक्षणिक संस्था व सार्वजनिक ठिकाणाच्या जवळपास तात्पुरत्या स्वरूपात पक्ष कार्यालये स्थापन करण्यावर निर्बंध घातले आहेत. या प्रतिबंधात्मक आदेशाचे उल्लंघन करणारी कोणतीही व्यक्ती भारतीय न्यायसंहिता, २०२३ मधील कलम २२३, तसेच इतर प्रचलित कायद्यांनुसार शिक्षेस पात्र राहील, असेही आदेशात नमूद केले आहे.
