Pune News – सारसबागेसमोरील श्री महालक्ष्मी मंदिरात आयोजित ब्रह्मोत्सवात उत्सव मूर्तींची धान्यतुला करून ते धान्य गरजूंना देण्याचा उपक्रम मंदिरात पार पडला. राजस्थान डिडवाना येथील अनंत श्री विभूषित जगतगुरू रामानुजाचार्य झालरिया पीठाधीपती पूज्य श्री श्री १००८ स्वामीजी घनश्यामाचार्य जी महाराज यांच्या हस्ते धान्यतुलेत धान्य आणि देवीला सोने- चांदी पुष्पअर्पण करून देवीचरणी सुख- शांतीसाठी प्रार्थना करण्यात आली. श्री बन्सीलाल रामनाथ अग्रवाल धार्मिक आणि सांस्कृतिक ट्रस्ट, श्री महालक्ष्मी मंदिर सारसबागच्या ४२ व्या वर्धापनदिनानिमित्त आयोजित ब्रह्मोत्सवात मंदिरात विविध कार्यक्रम सुरू आहेत. या वेळी ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अॅड. प्रताप परदेशी, हेमंत अर्नाळकर, नारायण काबरा, प्रवीण चोरबेले, भरत अग्रवाल, रमेश पाटोदिया, तृप्ती अग्रवाल उपस्थित होते. सामाजिक कार्यक्रमांमध्ये मंदिरातील श्री महालक्ष्मी, श्री महासरस्वती, श्री महाकाली, श्री विष्णू या उत्सव मूर्तींची धान्यतुला करून ते धान्य गरजूंना देण्याचा उपक्रम यंदाही राबण्यात आला. धान्यतुलेमध्ये विविध प्रकारचे धान्य, तेल, खाद्यपदार्थ, बिस्किटे आणि खाऊ ठेवण्यात आला होता, असे अमिता अग्रवाल म्हणाल्या.त्यानंतर उत्सवमूर्तीला सोने आणि चांदीची फुले मान्यवरांच्या हस्ते अर्पण करण्यात आली. धार्मिक कार्यक्रमामध्ये होमहवन, महाअभिषेक, असे विविध कार्यक्रम देखील मंदिरात सुरू आहेत. सर्व कार्यक्रम विनामूल्य खुले असून, पुणेकरांनी या महोत्सवात सहभागी व्हावे, असे आवाहन ट्रस्टतर्फे करण्यात आले आहे.
