पुणे – शहरातील प्रसिद्ध ‘कॅफे पिटर’ या ब्रँडच्या मालकी हक्कावरून मोठा आर्थिक वाद समोर आला असून, ब्रँड विक्रीच्या व्यवहारात २ कोटी ४ लाख ९३ हजार रुपयांची फसवणूक झाल्याची तक्रार आर्थिक गुन्हे शाखेकडे करण्यात आली आहे. याप्रकरणी बंडगार्डन पोलीस ठाण्यात गुन्हा दाखल करण्यात आला आहे. पोलिसांनी सांगितले की, विशालनगर येथील श्वेता सचिन साळुंखे (३५) यांनी कोरियन नागरिक चॅन सिओक जंग आणि कमलेश मारुती काळे यांच्याविरुद्ध तक्रार दाखल केली आहे. तक्रारीनुसार, श्वेता साळुंखे या युमसिंग फूडवर्क्स प्रायव्हेट लिमिटेड या कंपनीच्या संचालक असून त्या २०२१ पासून हॉटेल व्यवसाय करत आहेत. ३१ मार्च २०२२ रोजी त्यांनी ‘कॅफे पिटर’ या ब्रँडचे हक्क रेलिफा हॉस्पिटॅलिटी एलएलपी कडून ५ कोटी रुपयांना विकत घेतल्याचे त्यांनी सांगितले. Pune News या व्यवहारादरम्यान २ कोटी ४ लाख ९३ हजार रुपये चॅन सिओक जंग यांना देण्यात आल्याचे तक्रारीत नमूद आहे. उर्वरित रक्कम फ्रँचायझी धारकांची एनओसी, प्रलंबित देणी आणि इतर व्यवहार पूर्ण झाल्यानंतर देण्याचे ठरले होते. दरम्यान, १२ जुलै २०२४ रोजी ‘कॅफे पिटर’ या ब्रँडचा ट्रेडमार्क युमसिंग फूडवर्क्स प्रायव्हेट लिमिटेड या कंपनीच्या नावावर नोंदविण्यात आला होता. मात्र २०२५ मध्ये फ्रँचायझी करार नूतनीकरणासाठी बैठक घेतली असता, काही फ्रँचायझी धारकांनी कमलेश काळे यांनी हा ब्रँड चॅन सिओक जंग यांच्याकडून केवळ १० लाख रुपयांना विकत घेतल्याचा दावा केला. यानंतर अधिक तपास केला असता, २०२४ मध्ये चॅन सिओक जंग यांनी ‘ॲक्सेलार स्पोर्ट्स अँड एंटरटेनमेंट प्रा. लि.’ या कंपनीसोबत असाइनमेंट डीड करून ब्रँड विकल्याचा आरोप करण्यात आला आहे. तक्रारीनुसार, संबंधितांनी संगनमत करून पुण्यातील निगडी, फिनिक्स मॉल वाकड, कर्वेनगर, पुनावळे आणि कोथरूड येथे कॅफे पिटरची नवीन आउटलेट सुरू केली. तसेच फ्रँचायझी धारकांकडून डिपॉझिट, ब्रँड फी आणि रॉयल्टीच्या नावाखाली सुमारे ११ कोटी रुपये वसूल केल्याचाही आरोप करण्यात आला.
