हडपसर : पुणे महानगरपालिकेत समाविष्ट झालेल्या २३ गावातील ग्रामपंचायत मधील काही कर्मचाऱ्यांना महापालिकेत कर्मचारी म्हणून सामावून घेण्यासंदर्भात अडचणी येत असल्याचे वारंवार सांगितले जाते आहे. परंतु त्या अडचणी नेमक्या काय आहेत. या २३ गावातील शेकडो कर्मचाऱ्यांना महापालिकेत सामावून घ्यावे, यासाठी आज लक्षवेधी सूचना मांडली असून त्यावर संबंधित मंत्र्यांनी सकारात्मकता दर्शवली असल्याची माहिती विधान परिषदेचे आमदार योगेश टिळेकर यांनी ‘दैनिक प्रभात’शी बोलताना दिली. 23 गावे महापालिकेत समाविष्ट झाल्यानंतर या ग्रामपंचायत मधील काही कर्मचाऱ्यांना महापालिकेत सामावून घेण्यात आले. मात्र, शेकडो कर्मचाऱ्यांना महापालिकेत सामावून घेण्यास अपात्र करण्यात आले. समाविष्ट गावातील काही ग्रामपंचायतमधील शेकडो कर्मचारी अद्यापही रोजगारविना आहेत. यांना महापालिकेने सामावून घ्यावे यासंदर्भात सरकारचे लक्ष वेधण्यासाठी आज आपण ही सूचना मांडली असल्याचे योगेश टिळेकर यांनी यावेळी सांगितले. पुणे महापालिकेत समाविष्ट 23 गावातील ग्रामपंचायत कर्मचाऱ्यांना महापालिकेत सामावून घेण्यासंदर्भाततील प्रश्न काहीसा वेगळा आहे. तरीही येथील कर्मचारी महापालिकेत सामावून घेण्यासंदर्भात लवकरच आकृतीबंध करण्यासंदर्भात निर्देश दिले जातील ,अशा स्वरूपाचे उत्तर देऊन मंत्री उदय सामंत यांनी सकारात्मकता दर्शवली आहे. पुणे महानगरपालिकेत समाविष्ट झालेल्या २३ गावांतील कर्मचारी वर्गाच्या संदर्भात विशेष लक्षवेधी सूचना मांडण्यात आली. ग्रामपंचायतीतून या २३ गावांतील कर्मचारी वर्गाचा महानगरपालिकेत समावेश करण्यात यावा अशी मागणी केली आहे. मागील काही दिवसांपूर्वी आमदार भीमराव तापकीर यांच्या पुढाकाराने उपमुख्यमंत्री दालनात बैठक घेण्यात आली होती. तरीही शेकडो कर्मचारी वर्गाचा प्रश्न अद्याप प्रलंबित आहे. हा प्रश्न मंत्री महोदयांच्या निदर्शनास आणून देण्यात आला आहे. – योगेश टिळेकर आमदार, विधानपरिषद
