पुणे : पुणे शहरातील श्री महालक्ष्मी मंदिर, सारसबाग येथे ‘नवरात्र उत्सव २०२४’ दरम्यान तब्बल ५ हजार महिलांनी सामुहिकरित्या केलेल्या श्रीसूक्त आणि श्री गणपती अथर्वशीर्ष पठण, माता माता की जय… चा नामघोष आणि शंख वादनाच्या निनादाने श्री महालक्ष्मी मंदिराचा परिसर दुमदुमून गेला आणि नवरात्र उत्सवातील द्वितीयेची पहाट मंगलमय झाली.

श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्टच्यावतीने सामुहिक श्री सूक्त पठण कार्यक्रमाचे आयोजन करण्यात आले होते. ढोल-ताशा वादनाने कार्यक्रमाची सुरुवात झाल्यानंतर केशव शंखनाद पथक आणि श्रीमंत केसरी शंखनाद पथकातील वादकांचे शंखवादन झाले.

कार्यक्रमास पारंपरिक वेशात उपस्थित महिलांनी जय माता दी… च्या जयघोष करीत आसमंत दणाणून सोडला. श्रीसूक्त म्हणजे काय? त्याचे महत्व आणि महती याविषयी मीनल चौरसिया यांनी उपस्थितांना माहिती दिली. त्यानंतर अथर्वशीर्षाचा एक पाठ आणि श्री सूक्ताचे तीन पाठ असे सामुदायिकरित्या पठण करण्यात आले. कार्यक्रमाची सांगता आरतीने झाली.

यावेळी मुख्य आयकर आयुक्त रिना झा-त्रिपाठी, डॉ.सतिश देसाई, ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड. प्रताप परदेशी, भरत अग्रवाल, तृप्ती अग्रवाल, प्रवीण चोरबेले, हेमंत अर्नाळकर, निलेश लद््दड आदी उपस्थित होते.