Pune news – भारतीय जनता पक्षाचे खडकवासलाचे आमदार भीमराव तापकीर यांच्या घरात एका मद्यपीने शिरण्याचा प्रयत्न केला. सुरक्षेसाठी असलेल्या पोलिसांनी त्याला अडवताच त्याने शिवीगाळ करत गोंधळ घातला. ही घटना बुधवारी रात्री साडेदहाच्या सुमारास घडली.

याप्रकरणी सहकारनगर पोलिसांनी शंकर सर्जेराव धुमाळ(४७) असे अटक आरोपीचे नाव आहे. त्याच्यावर सरकारी कामात अडथळा, सार्वजनीक ठिकाणी शिवीगाळ, घरात घुसण्याचा प्रयत्न आदी चार कलमाअंतर्गत गुन्हा दाखल करण्यात आला. याप्रकरणी पोलीस कर्मचारी अजित देवघरे यांनी तक्रार दिली आहे.

वरिष्ठ पोलीस निरीक्षक राहुल गौड यांनी सांगितले की, रात्री आरोपी मद्यपान करुन आमदाराच्या घरापाशी आला. तेथील सुरक्षेसाठी तैनात असलेल्या कर्मचाऱ्यांना शिवीगाळ केली. त्यांना धक्काबुक्की करत घरात घुसण्याचा प्रयत्न केला.

सुरक्षा रक्षकांनी तातडीने पोलीस नियंत्रण कक्षाशी संपर्क साधला. पोलिसांनी त्याला अटक केली. चौकशीत तो सध्या पुण्यात एकटाच रहातो. त्याचा पुर्वी काचेचे ग्लास विक्रीचा व्यवसाय होता तसेच गावाकडे शेती आहे. दरम्यान वर्षभरापुर्वीही त्याने अशाच प्रकारे सुरक्षा कर्मचाऱ्यांना शिवीगाळ केल्याचे उघड झाले आहे.