Pune News : सामाजिक बांधिलकीचा वारसा जपत यंदाही निरामय वेलनेस सेंटरच्या वतीने दिवाळीचा उत्सव पुण्यातील (Pune News) स्नेहवन संगोपन केंद्रातील १०० मुलांसोबत मोठ्या उत्साहात आणि आनंददायी वातावरणात साजरा करण्यात आला. हा सोहळा केवळ दिवाळी साजरी करण्यापुरता मर्यादित न राहता प्रेम, माणुसकी, संवेदनशीलता आणि सामाजिक उत्तरदायित्व यांचा सुंदर संगम ठरला.

दिवाळी म्हणजे आनंद, उत्साह, प्रेम, आपुलकी आणि एकमेकांच्या आयुष्यात आनंदाचा प्रकाश निर्माण करण्याचा सण. मात्र, समाजातील प्रत्येक मुलाला हा आनंद अनुभवण्याची समान संधी मिळतेच, असे नाही. अशा वंचित आणि आधाराची गरज असलेल्या मुलांच्या आयुष्यात आनंदाचे काही क्षण निर्माण व्हावेत, त्यांच्या चेहऱ्यावर हसू फुलावे आणि त्यांनाही सणाचा आनंद मनमोकळेपणाने अनुभवता यावा, या सामाजिक जाणिवेतून निरामय वेलनेस सेंटरच्या (Pune News) वतीने दरवर्षी या उपक्रमाचे आयोजन करण्यात येते.

स्नेहवनचे कार्य समाजासाठी प्रेरणादायी !
स्नेहवन संगोपन केंद्राचे संस्थापक मा. अशोक देशमाने आणि त्यांच्या कुटुंबीयांचे कार्य अत्यंत मोलाचे आणि प्रेरणादायी आहे. प्रामुख्याने आत्महत्या केलेल्या शेतकरी कुटुंबांतील तसेच आधार गमावलेल्या मुलांच्या शिक्षणाची, संगोपनाची आणि उज्ज्वल भविष्याची जबाबदारी स्नेहवन केंद्र स्वीकारते. या मुलांना केवळ निवारा देणे एवढ्यापुरतेच संस्थेचे कार्य मर्यादित नसून, त्यांना आधुनिक शिक्षण, आवश्यक सुविधा, योग्य संस्कार आणि स्वावलंबी जीवनासाठी आवश्यक संधी उपलब्ध करून देण्यावर संस्थेचा भर आहे.

नवीन कपडे, फराळाची भेट !
निरामय वेलनेस सेंटरच्या वतीने आयोजित या दिवाळी सोहळ्यामध्ये जवळपास १०० मुला-मुलींना नवीन कपडे आणि दिवाळीचा फराळ भेट देण्यात आला. नवीन कपड्यांचा आनंद, फराळाचा गोडवा आणि सर्वांच्या सहवासातून मिळालेली आपुलकी यामुळे मुलांच्या चेहऱ्यावर आनंद ओसंडून वाहत होता. मुलांसोबत संवाद साधत, त्यांच्या आनंदात सहभागी होत आणि त्यांच्यासोबत दिवाळीचे क्षण अनुभवत संपूर्ण वातावरण उत्साहाने भारावून गेले.

या कार्यक्रमाला निरामय वेलनेस सेंटरच्या संस्थापिका अमृता चांदोरकर या स्वतः उपस्थित होत्या. त्यांनी मुलांशी मनमोकळा संवाद साधत त्यांच्या आवडी-निवडी, शिक्षण आणि भविष्यातील स्वप्नांविषयी जाणून घेतले. मुलांनी आपल्या आवडीच्या क्षेत्रात शिक्षण घ्यावे, स्वतःमधील क्षमता ओळखावी, आत्मविश्वासाने पुढे जावे आणि भविष्यात स्वावलंबी बनावे, यासंदर्भात त्यांनी मुलांना मोलाचे मार्गदर्शन केले. त्यांच्या संवादातून मुलांना केवळ प्रोत्साहनच मिळाले नाही, तर आपल्या भविष्याविषयी सकारात्मक विचार करण्याची प्रेरणाही मिळाली.

माणुसकीचा दिवाळी संदेश !
निरामय वेलनेस सेंटरचा नेहमीच असा प्रयत्न असतो की, समाजातील गरजू आणि वंचित घटकांच्या आयुष्यात आनंदाचे काही क्षण निर्माण व्हावेत. त्यांच्या चेहऱ्यावर समाधानाचे हास्य फुलावे आणि त्यांना आपणही समाजाचा एक महत्त्वाचा भाग आहोत, ही आपुलकीची जाणीव अनुभवता यावी. या सोहळ्यातून केवळ दिवाळीचा आनंद वाटला गेला नाही, तर माणुसकीचा प्रकाश, सामाजिक बांधिलकीची जाणीव आणि एकमेकांच्या आयुष्यात आनंद निर्माण करण्याचा सुंदर संदेशही दिला (Pune News) गेला.