Pune Metro – गणेशोत्सवाच्या काळात पुण्यातील मानाचे आणि प्रमुख गणपतींच्या दर्शनासाठी पिंपरी-चिंचवडमधून पुण्याकडे जाणाऱ्या भाविकांची संख्या मोठ्या प्रमाणात वाढते. त्यातच शहरातील वाहतूक कोंडी, पार्किंगची समस्या आणि गर्दीचा वाढता ताण लक्षात घेता यंदा गणपती दर्शनासाठी मेट्रोचा प्रवास भाविकांसाठी मोठा दिलासा ठरणार आहे. गणेशोत्सवाच्या पार्श्वभूमीवर पुणे मेट्रोने विशेष वेळापत्रक जाहीर केले असून, गर्दीच्या काळात मेट्रोच्या फेऱ्यांमध्ये वाढ करण्यात आली आहे.

मध्यरात्री २ वाजेपर्यंत सेवा सुरू
१४ ते १६ सप्टेंबरदरम्यान मेट्रो सेवा सकाळी ६ ते रात्री ११ वाजेपर्यंत सुरू राहणार आहे. त्यानंतर १७ ते २४ सप्टेंबरदरम्यान भाविकांची वाढती गर्दी लक्षात घेऊन सेवा मध्यरात्री २ वाजेपर्यंत सुरू ठेवण्यात येणार आहे. गर्दीच्या वेळेत प्रवाशांना जास्त वेळ प्रतीक्षा करावी लागू नये यासाठी दर पाच मिनिटांनी मेट्रो उपलब्ध करून देण्यात येणार आहे.

अनंत चतुर्दशीला ४१ तास सेवा
गणेशोत्सवाच्या अंतिम टप्प्यात आणि अनंत चतुर्दशीच्या दिवशी होणारी गर्दी लक्षात घेऊन मेट्रोने विशेष नियोजन केले आहे. २५ सप्टेंबर सकाळी ६ वाजल्यापासून २६ सप्टेंबर रात्री ११ वाजेपर्यंत तब्बल ४१ तास मेट्रो सेवा अखंड सुरू राहणार आहे. त्यामुळे रात्री उशिरापर्यंत गणपती दर्शन, विसर्जन मिरवणुका आणि शहरातील विविध भागांतील उत्सव पाहून परतणाऱ्या पिंपरी-चिंचवडकरांना सार्वजनिक वाहतुकीचा पर्याय उपलब्ध राहणार आहे.

पुण्यातील मध्यवर्ती पेठ भागात गणपती दर्शनासाठी मोठ्या प्रमाणावर गर्दी होण्याची शक्यता आहे. त्यामुळे भाविकांनी एका स्थानकावर मोठ्या प्रमाणात गर्दी न करता पर्यायी स्थानकांचा वापर करण्याचे आवाहन मेट्रो प्रशासनाने केले आहे.मार्गिका क्रमांक १ वरील प्रवाशांनी पेठ भागातील गणपती दर्शनासाठी महात्मा फुले मंडई स्थानकावर गर्दी न करता कसबा पेठ स्थानकाचा वापर करावा, असे आवाहन करण्यात आले आहे.

तसेच मार्गिका क्रमांक २ वरून प्रवास करणाऱ्या भाविकांनी वनाजच्या दिशेने येताना डेक्कन जिमखाना, तर रामवाडीच्या दिशेने येताना पीएमसी स्थानकाचा पर्याय वापरावा. गणेशोत्सवाच्या काळात १४ ते २६ सप्टेंबरदरम्यान महात्मा फुले मंडई स्थानक एकदिशात्मक पद्धतीने कार्यरत राहणार आहे. त्यामुळे या स्थानकावर प्रवाशांची मोठी गर्दी होण्याची शक्यता असून,

भाविकांनी प्रशासनाच्या सूचनांनुसार पर्यायी स्थानकांचा वापर करणे आवश्यक आहे.तसेच जिल्हा न्यायालय स्थानकावर मार्गिका बदलण्यासाठी होणारे इंटरचेंज टाळावे, असेही मेट्रो प्रशासनाने स्पष्ट केले आहे. गर्दीचे व्यवस्थापन आणि प्रवाशांची सुरक्षितता लक्षात घेऊन हे नियोजन करण्यात आले आहे.

पार्किंग आणि वाहतूक कोंडीपासून सुटका
गणेशोत्सवात पुण्यातील प्रमुख रस्त्यांवर वाहतूक कोंडी होण्याची शक्यता असते. अनेक ठिकाणी वाहतूक निर्बंध लागू करण्यात येतात, तर मध्यवर्ती भागात वाहनांना पार्किंगची समस्या निर्माण होते. अशा परिस्थितीत पिंपरी-चिंचवडमधून पुण्याकडे जाणाऱ्या भाविकांसाठी मेट्रो हा सोयीचा पर्याय ठरू शकतो.