Pune Mayor Election – नगरविकास विभागाकडून महापालिकेच्या महापौर, तसेच उपमहापौरपदांची निवड करण्यासाठी ३० ते ३१ जानेवारीची मुदत दिली असल्याचे अर्धवट पत्र सोशल मीडियावर व्हायरल झाले आहे. त्यामुळे महापौरपदाच्या निवडणुकीबाबत गोंधळाची स्थिती निर्माण झाली आहे.या पत्रावर शासनाच्या कोणत्याही विभागाचे नाव अथवा कोणत्याही अधिकाऱ्यांची स्वाक्षरी नाही.

त्यामुळे महापालिकेच्या नगरसचिव विभागातही गोंधळाची स्थिती असून, खबरदारीचा उपाय म्हणून महापालिकेकडून विभागीय आयुक्तांना शुक्रवारी पत्र पाठवत महापौर निवडीसाठी पीठासीन अधिकाऱ्याच्या नियुक्तीसह तारीख आणि वेळ देण्याची विनंती केली असल्याची माहिती महापालिकेच्या नगरसचिव योगिता भोसले यांनी दिली आहे.महापौरपदासाठी आरक्षणाची सोडत जाहीर झाल्यानंतर आता महापौरपदाचा निवडणूक कार्यक्रम सोशल मीडियावर व्हायरल झाला आहे.

त्यात मुंबई वगळता राज्यातील उर्वरीत सर्व महापौर, उपमहापौर निवड करण्यासाठी ३० ते ३१ जानेवारी दरम्यान नवनिर्वाचित सदस्यांची मुख्य सभा घेऊन निवड करण्यात यावी, असे नमूद करण्यात आले आहे. मात्र, शासनाकडून याबाबत कोणताही लेखी आदेश आलेला नसल्याचे महापालिकेच्या नगरसचिव योगिता भोसले यांनी सांगितले आहे.

मात्र, त्याच वेळी खबरदारीचा उपाय म्हणून नगरसचिव विभागाने दुसरीकडे विभागीय आयुक्तांना पत्र पाठविले असून, त्यात या निवडणुकीसाठी लागणाऱ्या कालावधीचा उल्लेख करत निवडणुकीसाठी वेळ, तसेच पीठासन अधिकाऱ्यांची नियुक्ती करण्याबाबत पत्र पाठविले आहे. मात्र, व्हायरल झालेल्या या अर्धवट पत्रामुळे महापौर (Mayor)  निवडीबाबत चांगलीच गोंधळाची स्थिती निर्माण झाली आहे.

व्हायरल वेळापत्रक…
सोशल मीडियावर व्हायरल झालेल्या वेळापत्रकाच्या सोबत इतर कोणतेही पत्र अथवा शासनाच्या कोणत्याही अधिकारी, तसेच विभागाचे अधिकृत पत्र नाही. याशिवाय या वेळापत्रकावर शासनाच्या कोणत्याही विभागाचे नाव अथवा शिक्का देखील नाही. या वेळापत्रकानुसार महापालिकेने २३ जानेवारीपर्यंत महापालिकेच्या नगरसचिवांनी विभागीय आयुक्तांना महापौर (Pune Mayor ) निवडीसाठी बोलविण्यात येणाऱ्या पहिल्या बैठकीची वेळ आणि तारीख कळवावी.

 

२४ ते २५ जानेवारी या कालावधीत विभागीय आयुक्तांनी महापालिकेच्या पहिल्या सभेची तारीख निश्चित करावी, तसेच पीठासन अधिकाऱ्यांची नियुक्ती करावी. याशिवाय २७ ते २८ जानेवारी पर्यंत नगरसचिवांनी महापौरपदासाठी इच्छुकांचे अर्ज मागविण्याची प्रक्रिया करावी. त्यानंतर ३० ते ३१ जानेवारीदरम्यान महापौर व उपमहापौर या पदांसाठी नवनिर्वाचित सदस्यांची बैठक घेऊन दोन्ही पदांसाठी निवडणूक घ्यावी, असे नमूद करण्यात आले आहे.