Mahalaxmi Temple Pune : सारसबागेसमोरील श्री महालक्ष्मी मंदिरातर्फे मंदिरासमोर २५ फूट उंच प्रतिकात्मक रावण दहनाचा कार्यक्रम आयोजित करण्यात आला. महिला अत्याचार, स्त्री भ्रूणहत्या, बालशोषण यांसह समाजातील विविध समस्यांचे प्रतीक म्हणून रावणाची प्रतिकृती तयार करण्यात आली होती. यावेळी प्रभू श्रीराम यांची वानरसेना आणि रावणाच्या सेनेतील युद्धाचा जिवंत प्रसंग तसेच रामायणातील विविध कथांवर आधारित प्रसंग सादर करण्यात आले.

रावणाची भव्य हलती प्रतिकृती, जिवंत देखाव्यातील हनुमान आणि जटायू हे कार्यक्रमाचे प्रमुख आकर्षण ठरले. रावण दहन पाहण्यासाठी पुणेकरांनी मोठी उपस्थिती लावली.

ट्रस्टचे प्रमुख संस्थापक व विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त ॲड. प्रताप परदेशी, विश्वस्त व उत्सव प्रमुख डॉ. तृप्ती अग्रवाल, विश्वस्त भरत अग्रवाल, प्रवीण चोरबेले, हेमंत अर्नाळकर, नारायण काबरा, राजेश सांकला, रमेश पटोदिया, राजकुमार चमडीया, निलेश लद्दड यांच्यासह पदाधिकारी व कार्यकर्त्यांनी उत्सवाचे आयोजन केले.

उत्सव प्रमुख डॉ. तृप्ती अग्रवाल म्हणाल्या की, नवरात्र उत्सवात स्त्री शक्तीचा जागर करण्यासोबत नारी शक्तीचा सन्मान करण्यात आला. रावण दहनातून महिला अत्याचार व स्त्री भ्रूणहत्येसारख्या समस्यांविरोधात तसेच स्त्री सबलीकरणाचा संदेश देण्यात आला. समाजातील वाईट विचार, व्यसनाधीनता आणि इतर अपप्रवृत्तींच्या प्रतीकात्मक रावणाचेही दहन करण्यात आले.

या उपक्रमात विश्वकर्मा विद्यापीठातील विद्यार्थी, शिक्षक व पदाधिकाऱ्यांनी सक्रिय सहभाग घेतला. यंदा प्रथमच आयोजित आरोग्य शिबिराला भक्तांचा उत्स्फूर्त प्रतिसाद मिळाला. रक्तदान शिबिरातही मोठ्या संख्येने नागरिक सहभागी झाले.