Pune : सावित्रीबाई फुले पुणे विद्यापीठाच्या मराठी विभागाच्या वतीने डॉ. तुकाराम रोंगटे लिखित ‘क्रांतिवीर राघोजी भांगरे’ या चरित्रग्रंथाचे प्रकाशन आणि त्यानिमित्त विशेष परिसंवादाचे आयोजन करण्यात आले आहे. हा कार्यक्रम मंगळवार (दि. २३) रोजी दुपारी ३ वाजता विद्यापीठातील वाणिज्य विभागाच्या चर्चासत्र सभागृहात होणार आहे.

या कार्यक्रमाच्या अध्यक्षस्थानी ज्येष्ठ समीक्षक तथा ९८ व्या अखिल भारतीय मराठी साहित्य संमेलनाचे अध्यक्ष प्राचार्य डॉ. श्रीपाल सबनीस हे असणार आहेत. विद्यापीठाचे प्र-कुलगुरू डॉ. पराग काळकर यांच्या हस्ते चरित्रग्रंथाचे प्रकाशन होणार आहे.

कार्यक्रमास ज्येष्ठ कवी आणि आदिवासी चळवळीतील ज्येष्ठ कार्यकर्ते वाहरू सोनवणे हे प्रमुख पाहुणे म्हणून उपस्थित राहणार आहेत. ग्रंथ प्रकाशनानंतर आयोजित विशेष परिसंवादात अहमदनगर महाविद्यालय (अहिल्यानगर) येथील मराठी विभागप्रमुख प्रा. डॉ. सुधाकर शेलार तसेच ज्येष्ठ साहित्यिक व संशोधक प्रा. विठ्ठल शेवाळे हे वक्ते म्हणून मार्गदर्शन करणार आहेत.

याशिवाय, अधिसभा सदस्य डॉ. हर्ष गायकवाड, लोकशाहीर अण्णा भाऊ साठे अध्यासनाचे डॉ. सुनील भंडगे आणि मानवविज्ञान विद्याशाखेचे अधिष्ठाता डॉ. प्रभाकर देसाई यांचीही कार्यक्रमास उपस्थिती लाभणार आहे.

हर्मिस प्रकाशनचे प्रा. सुशील धसकटे आणि मराठी विभागप्रमुख प्रा. डॉ. तुकाराम रोंगटे यांनी साहित्यप्रेमी, संशोधक आणि विद्यार्थ्यांनी या कार्यक्रमास मोठ्या संख्येने उपस्थित राहावे, असे आवाहन केले आहे.