Pune News : झाड तोडणीचे काम करताना सुरक्षिततेची योग्य खबरदारी न घेतल्याने रस्त्यात बांधलेल्या दोरीला दुचाकीस्वाराचा गळा अडकून अपघात झाल्याची घटना घडली आहे. ही घटना कोथरूड परिसरातील भुजबळ हाऊस, पोतनीस परिसरात घडली. या अपघातात दोन युवक जखमी झाले असून, एकाला गंभीर दुखापत झाली आहे. याप्रकरणी अलंकार पोलीस ठाण्यात गुन्हा क्रमांक २६/२०२६ अन्वये भारतीय न्याय संहिता २०२३ चे कलम १२५ (अ), १२५ (ब) व ३ (५) अंतर्गत गुन्हा दाखल करण्यात आला आहे. फिर्यादी सुधीर बालाजी लांडगे (वय २३, रा. फ्लॅट क्र. ९, बी विंग) यांनी दिलेल्या फिर्यादीत म्हटले आहे की, ते मित्र रामेश्वर अवतीकर यांच्यासोबत बुलेट दुचाकीवर मागे बसून वाडेश्वर हॉटेल येथील जिमवरून कर्वेनगरकडे जात होते. ११ फेब्रुवारी रोजी सकाळी सुमारे ११.२५ वाजण्याच्या सुमारास भुजबळ हाऊस, पोतनीस परिसरात रस्त्यात बांधलेली दोरी रामेश्वर यांच्या गळ्याला अडकली. त्यामुळे दुचाकीवरील दोघेही खाली पडले. रस्त्यात बांधलेल्या दोरीमुळे त्यांच्या जीवितास धोका निर्माण झाला असून, झाडे व फांद्या तोडण्याचे काम करणाऱ्या अनोळखी कंत्राटी कामगारांनी सुरक्षिततेची कोणतीही उपाययोजना न करता निष्काळजीपणे काम केल्याचा आरोप फिर्यादीत करण्यात आला आहे. या अपघातात सुधीर लांडगे यांना दुखापत झाली असून, रामेश्वर अवतीकर यांना गंभीर दुखापत झाली आहे. दोघांवर दीनानाथ मंगेशकर रुग्णालयात उपचार सुरू आहेत. या प्रकरणी अलंकार पोलीस ठाण्यात गुन्हा दाखल करण्यात आला असून, तपास पोलीस उपनिरीक्षक गणेश दीक्षित करीत आहेत. घटनास्थळी सहायक पोलीस आयुक्त सुजाता तानवडे आणि वरिष्ठ पोलीस निरीक्षक उल्हास कदम यांनी भेट दिली.
