Pune: श्री पूना गुजराती बंधू समाजाच्या अध्यक्षपदी जयंत शहा यांची एकमताने निवड करण्यात आली. संस्थेच्या कार्यालयात नुकत्याच झालेल्या विश्वस्त मंडळाच्या बैठकीत सर्व विश्वस्तांनी त्यांच्या नावावर शिक्कामोर्तब केले. यापूर्वी संस्थेचे अध्यक्ष नितीन देसाई यांचे ८ फेब्रुवारी रोजी निधन झाल्याने अध्यक्षपद रिक्त झाले होते. संस्थेच्या पुढील वाटचालीसाठी अनुभवी नेतृत्वाची गरज लक्षात घेऊन शहा यांच्यावर ही जबाबदारी सोपविण्यात आली. अध्यक्षपद स्वीकारल्यानंतर जयंत शहा म्हणाले, “संस्थेच्या परंपरेचा वारसा पुढे घेऊन जाण्यासाठी मी कटिबद्ध आहे. शैक्षणिक, सामाजिक व सांस्कृतिक उपक्रमांना अधिक बळ देण्यावर भर राहील.” अनुभवी उद्योजक आणि समाजसेवक – जयराज ग्रुपचे संचालक असलेले शहा हे ऑल इंडिया असोसिएशन ऑफ इंडस्ट्रीज (AIAI), मुंबई तसेच वर्ल्ड ट्रेड सेंटर (MVIRDC) कौन्सिल ऑफ मॅनेजमेंट, मुंबईचे सदस्य आहेत. जयराज डेव्हलपर्सच्या माध्यमातून ते गेल्या २५ ते ३० वर्षांपासून बांधकाम क्षेत्रात कार्यरत असून पुण्यातील अनेक जैन मंदिरांच्या उभारणीत त्यांचा सक्रिय सहभाग आहे. दहा वर्षांपूर्वी त्यांनी आई-वडिलांच्या स्मृतिप्रित्यर्थ गुजरातमधील त्यांच्या वडिलांच्या जन्मगावी चॅरिटेबल आयुर्वेदिक कॅन्सर हॉस्पिटलची स्थापना केली. ११३ वर्षांची परंपरा – सन १९१३ मध्ये स्थापन झालेली श्री पूना गुजराती बंधू समाज ही पुण्यातील गुजराती समाजाची प्रमुख संस्था आहे. सहा हजारांहून अधिक आजीवन सभासद असलेली ही संस्था सामाजिक, शैक्षणिक, व्यावसायिक व आरोग्यविषयक उपक्रमांद्वारे समाजाच्या विविध घटकांना जोडण्याचे कार्य करत आहे. कोंढवा येथील सुमारे चार एकर जागेवर उभारण्यात आलेल्या गुजरात भवन, जयराज क्लब व स्पोर्ट्स अँड कन्व्हेन्शन सेंटरमध्ये राष्ट्रीय स्तरावरील विविध क्रीडा स्पर्धांचे आयोजन केले जाते. हे सांस्कृतिक संकुल सुमारे दोन लाख पन्नास हजार चौरस फूट परिसरात विस्तारलेले आहे. शहा यांच्या नेतृत्वाखाली संस्था अधिक सक्षमपणे कार्य करेल, असा विश्वास संस्थेचे मॅनेजिंग ट्रस्टी डॉ. राजेश शहा यांनी व्यक्त केला.
