pune : मद्यधुंद प्रवाशाने कॅबचालकाला मारहाण करून जखमी केल्याची तसेच त्याची गाडी पेटवून देण्याची धमकी दिल्याची घटना हडपसरला घडली. याप्रकरणी दोघांविरुद्ध हडपसर पोलिस ठाण्यात गुन्हा दाखल झाला आहे.

याबाबत विनायक लाडप्पा क्षिरसागर ( २८, रा. उरुळी देवाची) यांनी फिर्याद दिली आहे. त्यानुसार रोहित संदीप गोयत ( २३) आणि सागर राजेश यादव ( २९, दोघे रा. कुमार पार्क, मगरपट्टा) यांच्यावर गुन्हा दाखल झाला आहे. ही घटना १८ ऑक्टोबर रोजी रात्री पावणे दोनला ॲमनोरा टाउन परिसरातील मार्वेल फ्यूगो कमेरिकल जवळ घडली.

आरोपी रोहित गोयत याने रॅपिडो ॲपवरून कॅब बुक केली होती. त्याला घेण्यासाठी फिर्यादी क्षिरसागर तेथे गेले असता रोहित मद्यधुंद अवस्थेत होता. सांगितलेल्या ठिकाणी कॅब घेऊन का आला नाही, असे म्हणत त्याने क्षीरसागर यांच्या पोटात तसेच शरीराच्या संवेदनशील भागावर मारहाण केली.

यानंतर रोहितने त्याचा मित्र सागर यादव याला बोलावून घेत त्यांनी आरडाओरड करत मारहाण केल्याचे फिर्यादीत म्हटले आहे. याचा तपास हवालदार शिंदे तपास करीत आहेत.