प्रभात वृत्तसेवा पुणे – पुणे ग्रँड टूर- २०२६ च्या टप्पा-१ पिंपरी चिंचवड पालिका क्षेत्र, मुळशी व मावळ तालुक्यातून जाणार आहे. जिल्ह्यातील पर्यटनाची प्रचंड क्षमता असलेली ठिकाणे जगाच्या नकाशावर यावीत; त्या माध्यमातून येथील अर्थव्यवस्थेला चालना आणि स्थानिक तरुणांना त्याच ठिकाणी रोजगार मिळावा या उद्देशाने या आंतरराष्ट्रीय स्पर्धेचे आयोजन करण्यात आल्याचे जिल्हाधिकारी जितेंद्र डुडी यांनी सांगितले. ही स्पर्धा यशस्वी करण्यासाठी स्पर्धामार्गावरील नागरिकांनी सहकार्य करावे, असे आवाहनही त्यांनी केले. जिल्हाधिकारी डुडी यांनी मावळ, मुळशी या तालुक्यांतील स्पर्धा मार्गाची पाहणी केली. त्यावेळी ते बोलत होते. यावेळी जिल्हाधिकारी डुडी यांनी सांगितले की, आंतरराष्ट्रीय दर्जाची आणि ऑलिम्पिक पात्रतेची स्पर्धा असल्याने त्या दर्जाचे रस्ते तयार करण्यात आले आहेत. त्यासाठी सुमारे ४०० कोटी रुपये मिळाले असून, केवळ तीन महिन्यांत ३५० कि.मी. रस्ते तयार करण्यात आले आहेत. या वर्षी सुमारे ५०० कि.मी. ची स्पर्धा होत असून, दरवर्षी त्यात वाढ करीत चार वर्षात १ हजार ५०० कि.मी. पर्यंत नेण्याचे उद्दीष्ट आहे. येथील नैसर्गिक सौंदर्य, पर्यटनस्थळे, शिवकालीन इतिहास जगभर पोहोचविण्याची संधी आहे. मार्गाचे मोठ्या क्रीडा वाहिन्यांवर थेट प्रक्षेपण होणार असल्याने मार्गावर स्वच्छता ठेवावी, मार्गावर पाळीव प्राणी येऊ देऊ नयेत, असे आवाहनही त्यांनी केले. ही स्पर्धा फक्त महाराष्ट्राची नव्हे तर देशाची सर्वात मोठी स्पर्धा असणार आहे. पावणेदोनशेच्या वर स्पर्धक भाग देणार आहेत. मुळशी, मावळ, भोर, राजगड येथे स्पर्धेचा मार्ग असणार आहे. त्यामुळे येथील इतिहास पुढे येणार आहे. येथील नागरिक स्पर्धेसाठी उत्साहाने मदत करीत आहेत. येथील नागरिकांचे नाव त्यांच्या कायम आठवणीत राहील, असे चांगले स्वागत व आदरतिथ्य करावे. स्पर्धेवेळी येथील ग्रामस्थांनी, नागरिकांनी स्पर्धेच्या मार्गावर बाजूला उभे राहून खेळाडूंचा उत्साह वाढवावा. सर्वांनी एकत्रित होऊन मोठे काम होऊ शकते हे दाखवून देऊ, असा विश्वास जिल्हाधिकारी यांनी व्यक्त केला.
