Pune Gramin : ओतूर पोलीसांनी बिगरशेती जमिन क्षेत्राचा बनावट पोटखराबाचा सातबारा तयार करून आणि त्याचा गैर वापर करून फसवणुक करणे, जीवे मारण्याची धमकी देत खंडणी मागणे, बेकायदेशीर जमाव जमवुन अतीक्रमण करणे याबाबत गुन्हा दाखल करुन तपासा अंती दोन व्यक्तीना अटक केली असल्याची माहिती सहायक पोलीस निरीक्षक एल.जी.थाटे यांनी दिली. प्रकरणी स्थानिक पोलिसांनी दोन जणांना अटक केली आहे. सदर गुन्हयाची थोडक्यात हकीकत अशी की, ओंकार अशोक डुंबरे, वय ३०, रा. ओतुर (कोळमाथा), ता. जुन्नर, जि. पुणे यांनी यांचे वडिल यांची आजी सिताबाई डुंबरे यांनी कोंडीबा थोंडीबा डुंबरे व केरू थोंडीबा डुंबरे यांच्याकडून सन १९६३ मध्ये एकूण १०२ गुठे शेतजमीन खरेदी केली होती. सन १९७१ मध्ये शरद सावळेराम दांगट यांना आण्णासाहेब वाघिरे कॉलेजच्या शिक्षकांच्या वसाहतीसाठी २० गुंठे बिगरशेती जागेची आवश्यकता असल्याने सिताबाई डुंबरे यांच्याकडून २० गुंठे जमीन घ्यायचे त्यांचे आपसांत ठरले. परंतू शासकीय नियमाननुसार बागायती जमीनीची बिगरशेती जमीन करण्यासाठी ४० गुंठे जमीन आवश्यक असल्याने शंकर दांगट यांना ४० गुंठे जमीन खरेदी खताने दयायची, व नंतर त्यातील २० गुंठे जमीन परत घ्यायची, असे त्यांच्यात ठरले. तसे ठरल्याप्रमाणे सन १९७१ मध्ये सिताबाई डुंबरे यांनी ४० गुंठे जमीन शंकर दांगट यांना खरेदीखताने नाममात्र शुल्काने विकली. आणि शंकर दांगट यांनी सदर ४० गुंठे जमीन शासनाकडून बिगरशेती करून घेतली व त्यांना आवश्यक असलेली २० गुंठे बिगरशेती जमीन त्यांच्याकडे ठेवून सन १९७८ साली त्या ४० गुंठे जमीनीपैकी २० गुंठे बिगरशेती जमीन ठरल्याप्रमाणे सिताबाई डुंबरे यांना खरेदीखत विक्रीव्दारे परत दिली. सदर ४० गुंठे बिगरशेती जमीनीत कोणत्याही प्रकारचे पोटखराबा क्षेत्र नव्हते. परंतू कालांतराने त्याठिकाणी २० गुंठे पोखराबा क्षेत्र असल्याचा बनावट सातबारा आरोपी शंकर दांगट, कैलास हांडे, शंकर पोळ यांनी संबधित तलाठी व मंडल अधिकारी यांच्यासोबत संगनमत करून तयार केला. सदर २० गुंठे पोटखराबा क्षेत्रास सिताबाई डुंबरे यांच्या २० गुंठे बिगरशेती क्षेत्राच्या दक्षिणोत्तर सीमा दाखवून २० गुंठे पोटखराबा अस्तीत्वात आणले. त्याव्दारे शंकर दांगट यांच्या नावावर असलेले २० गुंठे बिगरशेती क्षेत्र व बनावट २० गुंठे पोटखराबा क्षेत्र असे एकूण ४० गुंठे क्षेत्र कैलास हांडे व शंकर पोळ यांनी खरेदी केले. कैलास हांडे व शंकर पोळ यांनी सिताबाई डुंबरे यांच्या २० गुंठे बिगरशेती क्षेत्रामध्ये १९७२ पासून असलेली विहीर, पाण्याची टाकी व १५ वर्षापासून असलेली कांदयाची चाळ असे संबधित तलाठी व मंडल अधिकारी यांच्या संगनमताने सदर बनावट २० गुंठे पोटखराबा क्षेत्राच्या सातबाऱ्यावर नोंदवून घेतले व त्याचाच आधार घेवून विजमहामंडळाकडे सदर विहीरीवर वीज कनेक्शन घेण्यासाठी अर्ज केला. सन २०२२ मध्ये कैलास हांडे व शंकर पोळ यांनी त्यांचे सोबत ८ ते १० इसम यांचेसह सिताबाई डुंबरे यांचे २० गुंठे बिगरशेती क्षेत्रामध्ये अनाधिकृतपणे येवुन सिताबाई डुंबरे यांचे वारस अशोक बापु डुंबरे यांना “विहीरंच आमची आहे, तुम्ही मध्ये येवु नका अशी दमदाटी करून, विहीरीमध्ये बळजबरीने पाण्याची मोटार टाकुन “आमच्या नादाला लागु नका, अन्यथा आम्ही तुम्हाला जिवे मारुन टाकु” अशी दमदाटी करून सदर क्षेत्रामध्ये असलेल्या विहीरीमध्ये बळजबरीने पाण्याची मोटार टाकली. तसेच सदर विहीरीवर सन १९७३ पासून आजतागायत पर्यंत असलेले वीज कनेक्शन तोडण्यासाठी कैलास हांडे व शंकर पोळ यांनी विजमहामंडळाकडे अर्ज केला. सदर बनावट २० गुंठे पोटखराबा क्षेत्राचे ७/१२ बाबत तसेच विहीरी मध्ये बळजबरीने टाकलेल्या पाण्याचे मोटार काढण्याबाबत फिर्यादी यांचे नातेवाईक यांनी कैलास हांडे व शंकर पोळ यांना सांगितले असता “आम्ही केलेल्या खोट्या खरेदीखताचा खर्च तुम्ही आम्हाला आठ लाख रुपये द्या व विहीरीतील मोटार काढण्यासाठी दोन लाख रुपये द्या” असे म्हणुन ” आम्हाला खर्च दिल्यास आम्ही पोटखराबा क्षेत्राची खरेदी रद्द करु, मात्र तुम्ही पैशांची मागणीही पुर्ण करत नाहीत, म्हणुन आम्ही आमची कागदपत्र बनवत चाललो आहे, तुम्हाला काय करायचे ते करा, आम्ही तुम्हाला संपवणारच” अशी धमकी देवुन रक्कमेची मागणी केली आहे. दाखल गुन्हयाचा तपास वरिष्ठ अधिकारी यांचे मार्गदर्शनाखाली ओतुर पोलीस स्टेशन प्रभारी अधिकारी स. पो. नि. लहु थाटे हे स्वतः करत आहेत. गुन्हयाचे अनुशंगाने आरोपी शंकर सावळेराम दांगट, रा. उंब्रज नं. २, ता. जुन्नर, जि. पुणे यांचेकडे तपास केला असता त्यांनी सांगितले की, कैलास हांडे व शंकर पोळ यांना २० गुंठे बिगरशेती क्षेत्र विकले असुन त्या दोघांनी सदरचा उतारा काढुन आणला व सदर खरेदीखताचे कागदपत्र तयार करुन सब रजीस्टर यांचे पुढे खरेदीखतावर मी सही केली आहे. त्यानंतर कैलास देवराम हांडे व शंकर गणपत पोळ यांनी सदर जमीनीबाबत कधीही ताब्यासाठी किंवा सिमा दाखविण्यासाठी तसेच इतर हक्कांचे अधिकारासाठी म्हणजेच विहीर, कांदाचाळ, पाण्याची टाकी व पडकी इमारत इत्यादी बाबत माझेकडे कधीही विचारणा केली नाही. अशी हकिगत सांगितली आहे. यावरून असे निदर्शनास आले की, कैलास हांडे व शंकर पोळ यांना सदरचे पोटखराबा क्षेत्र बोगस आहे हे माहीती असल्याने त्यांनी कधीही शंकर दांगट यांना त्या क्षेत्राबद्दल विचारणा केली नाही. खरेदी घेतानाही त्यांना त्या क्षेत्राबद्दल माहीती दिली नाही. म्हणुन आरोपी कैलास हांडे व शंकर पोळ यांचा हेतु केवळ या क्षेत्राच्या खरेदीद्वारे शंकर दांगट यांचे क्षेत्रालगत असलेल्या अशोक डुंबरे यांचे क्षेत्र फसवणुकीने, बनावट कागदपत्रे तयार करून व दमदाटी करून बळकावणे व अशोक डुंबरे यांचे इतर अधिकार मुख्यतः विहीर व कांदाचाळ यांची नोंद बोगस पोटखराबा क्षेत्राच्या बनावट ७/१२ उतारा यावर लावुन घेवुन स्वतःचा फायदा करून घेणे हा होता असे प्रथमदर्शनी तपासात निदर्शनास आले आहे. यातील आरोपी १) कैलास देवराम हांडे व २) शंकर गणपत पोळ यांनी सदर गुन्ह्यात अटक होवु नये म्हणुन सत्र न्यायालय खेड यांचेकडे अटकपूर्व जामिन मिळणेसाठी अर्ज केला होता. त्याबाबत सुनावणी झाली असुन मा.न्यायालयाने तपासी अधिकारी यांचे म्हणने ऐकुन व सदर गुन्हयाची कागदपत्रे तपासुन सदर दोन्ही आरोपींचा अटकपूर्व जामिन नाकारला. त्याप्रमाणे आरोपी कैलास देवराम हांडे व शंकर गणपत पोळ यांना दि. १७/१/२०२५ रोजी सदर गुन्ह्यात अटक करणेत आली. अटक आरोपींना दि. १८/१/२०२५ रोजी जुन्नर न्यायालय यांचे समक्ष रिमांड कामी हजर केले असता न्यायालयाने सदर दोन्ही आरोपींना २ दिवस पोलीस कस्टडी दिली आहे. सध्या दोन्ही आरोपी पोलीस कस्टडी रिमांड मध्ये आहेत.
