बारामती (प्रतिनिधी) : बारामती तालुक्यातील झारगडवाडीत पत्रकारासह त्यांच्या वयोवृद्द असलेल्या आई-वडिलांवर चाकूने खुनी हल्ला करण्यात आला आहे. झारगडवाडीत पत्रकार नवनाथ बोरकर त्यांची आई इंदुबाई धनाजी बोरकर आणि वडील धनाजी माधव बोरकर हे साठ वर्षांपासून राहत आहेत. त्यांच्या घराकडे जाणाऱ्या रस्त्याचा अनेक वर्षांपासून वाद आहे याबाबत वयोवृद्ध धनाजी माधव बोरकर यांनी आणि त्यांच्या मुलाने बारामतीचे तहसीलदार गणेश शिंदे यांच्याकडे घराकडे येणारा रस्ता अडवल्याबाबत अपील केले होते. या संदर्भात बारामतीचे तहसीलदार यांनी 1 जुलै 2024 रोजी धनाजी बोरकर आणि त्याच्या सहकार्यांच्या बाजूने रस्ता खुला करण्याचा आदेश पारित केला आहे. याबाबत तहसीलदार यांनी पोलीस बंदोबस्त देण्याचे पत्र पुण्याचे पोलीस अधीक्षक यांना दिले आहे. या रस्त्याबाबत 6 जून रोजी धनाजी माधव बोरकर यांनी रस्त्याबाबत कुटुंबासह आत्मदहन करण्याचा इशारा दिला होता. यावर तालुका पोलीस यांनी रस्ता अडवणाऱ्यांना तालुका पोलिस ठाण्यात बोलावून सांगितले होते की, बीके बी एन रोड ते धुळदेव माणिक बोरकर हा रस्ता खुला करण्याचा आदेश दिला आहे रस्ता अडवू नका अशी ताकीत दिली होती. तरी देखील आज सकाळी अकराच्या दरम्यान त्यांनी आमच्या विरोधात पोलिसांत तक्रार करतो आमच्या विरोधात बातम्या करतो काय आता तुला आणि तुझ्या कुटूंबाला जिवंत ठेवणार नाही असे म्हणत अमर बोरकर, रामभाऊ बोरकर यांनी वयोवृध्द वडील आणि आईवर चाकूने हल्ला केला. आणि मंजाबापू बोरकर,विक्रम बोरकर, अनिकेत बोरकर, आदित्य आजिनाथ बुरुंगले, विशाल दादासो बोरकर, यांनी लोखंडी रॉड ने मारहाण केली यात पत्रकार नवनाथ बोरकर, त्यांचे वयोवृद्ध वडील धनाजी बोरकर आणि आई इंदुबाई बोरकर हे गंभीर जखमी झाले आहेत. त्याच्यावर अहिल्यादेवी होळकर वैद्यकीय रुग्णालयात उपचार सुरु आहेत.
