Pune Ganeshotsav 2026 :  गणपतीच्या विविध कलारूपांमधून महाराष्ट्राची कला, संस्कृती आणि परंपरा जाणून घेण्याची संधी पुणेकरांना मिळणार आहे. झापुर्झा संग्रहालयाच्या वतीने हॅपी कॉलनी, कोथरूड येथील पु ना गाडगीळ आणि सन्सच्या दालनात गणपती विषयावरील विशेष प्रदर्शन आयोजित करण्यात आले आहे. ‘रूपे अनेक… नावं अनेक… भाव मात्र एक!’ अशी या प्रदर्शनाची संकल्पना आहे.

प्रदर्शनात पितळ, तांबे, चांदी, लाकूड आणि दगड अशा विविध माध्यमांतून तयार केलेल्या गणेशमूर्ती पाहता येणार आहेत. त्यासोबत गणपतीची चित्रे, लिथोग्राफ्स, भरतकामातून साकारलेल्या कलाकृती आणि आधुनिक कलेतील गणेशरूपांचाही समावेश आहे.

येथील काही गणेशमूर्ती विदर्भ, सांगली आणि महाराष्ट्रातील इतर भागांतील आहेत. काही मूर्ती दख्खन प्रदेशातील कलापरंपरेचे प्रतिनिधित्व करतात. त्यामुळे विविध भागांतील गणेशमूर्तींची कलाशैली, कारागिरी आणि सौंदर्यदृष्टी एकाच ठिकाणी पाहण्याची संधी मिळत आहे.

गणपतीशी संबंधित दुर्मीळ कलावस्तू हेही प्रदर्शनाचे वैशिष्ट्य आहे. गौरीचे विविध मुखवटे, शिवपंचायतन यांसारख्या वस्तू येथे पाहता येणार आहेत. प्रदर्शनातील अनेक कलाकृती १८वे, १९वे आणि २०वे शतकातील असून, त्यातून त्या काळातील कला, कारागिरी, श्रद्धा आणि परंपरांचे दर्शन घडते.

याशिवाय स्फटिक, माणिक आणि जेड यांसारख्या रत्नांपासून तयार केलेल्या निवडक गणेशमूर्ती विक्रीसाठीही उपलब्ध आहेत. त्यामुळे कलारसिकांना या कलाकृती पाहण्यासोबतच आपल्या आवडीनुसार गणेशमूर्ती निवडण्याची संधी मिळणार आहे.

गणपतीची रूपे, माध्यमे आणि कलाशैली वेगवेगळी असली, तरी त्यामागील श्रद्धा आणि भक्तिभाव एकच आहे, हा या प्रदर्शनाचा मुख्य विचार आहे. पारंपरिक कलाकृतींपासून आधुनिक कलाविष्कारापर्यंतचा हा प्रवास कला, इतिहास, संस्कृती आणि गणेशभक्तीचा सुंदर संगम घडवून आणतो.