माऊलींचा पालखी सोहळा यंदा दौंडज मुक्‍कामी
वर्गखोली उघडण्यावरून सोहळा कमेटी, शाळा प्रशासनात गैरसमज
पालखी सोहळा महामार्गावर एक तास ताटकळला

वाल्हे – श्री संतश्रेष्ठ ज्ञानेश्‍वर महाराज यांचा पालखी सोहळ्याचा परतीचा प्रवास सुरू आहे. पालखी सोहळ्याचा मुक्‍काम वाल्हे (ता. पुरंदर) येथील महर्षि वाल्मिकी विद्यालयात दरवर्षी असतो; मात्र शाळा प्रशासन व पालखी सोहळा कमिटी यांच्यामध्ये वर्गखोल्या उघडण्यावरून, गैरसमज निर्माण होत, आद्यरामायणकार महर्षि वाल्मिकींच्या गावाची पालखी मुक्‍कामाची परंपरा सोमवारी (दि. 18) मोडीत काढत पालखी सोहळा दौंडज (ता. पुरंदर) येथील ग्रामदैवत श्री भैरवनाथ मंदिराकडे मुक्‍कामी मार्गस्थ करण्यात आला.

वाल्हेकर ग्रामस्थांनी व पदाधिकारी, व शिक्षकवृंद यांनी पालखी सोहळा कमिटी यांना वारंवार विनंती करत पालखी सोहळा वाल्हे येथेच मुक्कामी ठेवावा अशी विनंती करत होते. दरम्यान वाल्हेकर ग्रामस्थ व पदाधिकाऱ्यांना यावेळी घहीवरून आले होते. या दरम्यान, पालखी सोहळा पुणे- पंढरपूरात पालखी महामार्गावर एक तास तसाच उभा होता. वाल्हेकर ग्रामस्थ व पदाधिकारी, शिक्षकवृंद यांनी सोहळा कमिटीला विनवणी करीत, आमची चूक झाली, आम्ही माफी मागतो सोहळा कमिटीचे पाय धरले. तरीही आम्हीला पालखी सोहळा येथे मुक्‍कामी ठेवायचाच नाही असे म्हणत पालखी सोहळा पुढे मार्गस्थ केला. यावेळी, वाल्हेकर ग्रामस्थ व पदाधिकाऱ्यांकडून सोहळा कमिटीवर नाराजी व्यक्त करण्यात आली.

दरम्यान, पालखी सोहळा दौंडज येथे पोहोचल्यानंतर दौंडज गावचे सरपंच सीमा भुजबळ यांनी पालखी सोहळ्याचे स्वागत केले.
दरम्यान समाज आरतीच्या अगोदर पालखी सोहळ्याच्या पाठीमागे गोरेकर दिंडीचे विणेकरी खिरीड व दिंडी क्रमांक 34 चे मालक अरविंद शर्मा यांचे निधन झाले. त्यांना यावेळी, सोहळ्यातर्फे श्रद्धांजली वाहण्यात आली.

यावेळी समाज आरती घेण्यात आली. यावेळी पुरंदरच्या तहसीलदार रूपाली सरनोबत, जेजुरी पोलीस ठाण्यातील पोलीस निरीक्षक उमेश तावस्कर, गटविकास अधिकारी अमर माने, सोहळा प्रमुख योगेश देसाई, चोपदार बाळासाहेब आरफळकर, वाल्हे गावचे सरपंच अमोल खवले, यांच्यासह वाल्हे व दौंडज गावचे ग्रामस्थ मोठ्या संख्येने उपस्थित होते.

पादुकांची विधिवत पूजा
वाल्हे गावचे मांडके कुटुंब यांच्या हस्ते माऊलींच्या पादुकाचे पूजन करण्यात आले. यावेळी अशोक मांडके, बाळकृष्ण भालचंद्र मांडके, रोहित मांडके यांच्या हास्ते माऊलींच्या पादुकांची विधिवत पूजा करण्यात आली. यावेळी राजकुमार अग्रवाल मित्रपरिवार पुणे व माऊली सेवा मंडळ कल्याण यांच्या वतीने महाप्रसादाचे आयोजन करण्यात आले होते.