जिल्ह्यातील राष्ट्रवादी कॉंग्रेसच्या पदाधिकाऱ्यांची पुण्यात बैठक

इंदापूर  – सध्याच्या राजकीय परिस्थितीत महाराष्ट्र राज्याची वेगाने प्रगती साधून, राष्ट्र पुढे नेण्याच्या उपमुख्यमंत्री अजित पवार यांच्या भूमिकेचे, समर्थन व स्वागत पुणे जिल्हा राष्ट्रवादी कॉंग्रेसने एकमुखाने जोरदार समर्थन केले.

जिल्हा राष्ट्रवादी कॉंग्रेसच्या वतीने पुण्यातील जिल्हा मध्यवर्ती सहकारी बॅंकेच्या सभागृहात विशेष बैठक जिल्हा अध्यक्ष प्रदीप गारटकर यांच्या अध्यक्षतेखाली पार पडली. यावेळी जिल्ह्याच्या ग्रामीण भागातील सर्व तालुक्‍यातून पक्षाचे प्रमुख पदाधिकारी, प्रदेश पदाधिकारी व विविध संस्थांचे पदाधिकारी, जिल्हा बॅंकेचे संचालक, जिल्ह्यातील बाजार समितीचे सर्व पदाधिकारी उपस्थित होते.

उपमुख्यमंत्री अजित पवार यांचा शनिवारी (दि. 22) वाढदिवस असून प्रत्येक तालुक्‍यात विविध कार्यक्रम, सामाजिक उपक्रम राबण्याचे ठरले तसेच याबद्दल पदाधिकाऱ्यांना गारटकर यांनी सूचना केलेल्या आहेत. बुथ सर्वेक्षण अभियान संपूर्ण जिल्हाभर राबविण्याचा निर्धार यावेळी करण्यात आला.

जिल्ह्यातील काही तालुक्‍यांमधील आमदार यांची भूमिका अजूनही संदिग्ध आहे अशा तालुक्‍यात पक्ष संघटनेमध्ये असलेला संभ्रम दूर करण्यासाठी तालुका निहाय बैठकांचे आयोजन करण्यात येणार आहे.
प्रदीप गारटकर, जिल्हाध्यक्ष, राष्ट्रवादी कॉंग्रेस

प्रतिज्ञापत्र भरून घेणार
उपमुख्यमंत्री अजित पवार यांच्या समर्थनार्थ पाठिंबा व्यक्त करण्यासाठी प्रत्येक तालुक्‍यातील पदाधिकाऱ्यांनी 100 रुपयांच्या स्टॅम्प पेपरवर प्रतिज्ञापत्र तातडीने भरून देण्याविषयी निर्णय झाला.

गारटकर ठरले यशस्वी
उपमुख्यमंत्री अजित पवार यांनी राज्य सरकारला दिलेल्या पाठिंबाबद्दल त्यांच्या समर्थनासाठी पदाधिकारी व संस्थांचे पदाधिकाऱ्यांनी एकमुखाने राज्यात पहिल्यांदाच अजित पवार गटाची बैठक यशस्वी करण्यात प्रदीप गारटकर यशस्वी ठरले आहेत.+++