शिरूर तहसील कार्यालयातील आरक्षणाकडे लक्ष
शिरूर – शिरूर तालुक्यातील ग्रामपंचायतींसाठी मोठी आणि महत्त्वाची प्रक्रिया आठवड्यात पार होणार आहे. एकूण ९६ ग्रामपंचायतींच्या सरपंचपदासाठीचे आरक्षण शुक्रवारी (दि.११) रोजी निश्चित करण्यात येणार आहे.

ही आरक्षण प्रक्रिया अनुसूचित जाती (SC), अनुसूचित जमाती (ST), इतर मागास वर्ग (OBC) आणि महिला या प्रवर्गासाठी पार पडणार असून, सोडतीच्या माध्यमातून आरक्षण निश्चित केले जाईल, अशी माहिती शिरूरचे तहसीलदार बाळासाहेब म्हस्के यांनी दिली.

म्हस्के म्हणाले की, आरक्षण निश्चितीची ही पारदर्शक प्रक्रिया मुख्य प्रशासकीय इमारतीच्या तिसऱ्या मजल्यावरील सभागृह क्रमांक एकमध्ये दुपारी १२ वाजता सुरू होणार आहे.

कार्यक्रमात सर्व संबंधित अधिकाऱ्यांच्या उपस्थितीत आणि जनतेच्या समोर ही आरक्षण सोडत काढण्यात येईल. प्रक्रियेमध्ये प्रत्येक ग्रामपंचायतीच्या सरपंच पदासाठी वरील चार प्रमुख प्रवर्गांमधील आरक्षणाचे प्रमाण लक्षात घेऊन संगणकीकृत लॉटरी प्रणालीद्वारे (सोडत) आरक्षण निश्चित केले जाणार आहे.

इच्छुकांचा जीव टांगणीला
दरम्यान, ही आरक्षण प्रक्रिया आगामी स्थानिक स्वराज्य संस्थांच्या निवडणुकांच्या पार्श्वभूमीवर महत्त्वाची आहे. त्यामुळे शिरूर तालुक्यातील राजकीय घडामोडींना नवसंजीवनी मिळणार असल्याचे जाणकारांचे मत आहे. ही आरक्षण यादी जाहीर झाल्यानंतर आगामी ग्रामपंचायत निवडणुकांची रूपरेषा स्पष्ट होणार आहे. अनेक इच्छुक उमेदवार आणि राजकीय गटांचे भवितव्यही यावर अवलंबून राहणार आहे. त्यामुळे सोडतीकडे शिरूर- आंबेगाव तालुक्यातील राजकीय पदाधिकाऱ्यांचे लक्ष लागले आहे.