Pune District | इंदापूर तालुक्यात परिवर्तन अटळ, राजकीय निर्णय सगळ्यांना विश्वासात घेऊनच घेणार – हर्षवर्धन पाटील
इंदापूर (प्रतिनिधी) – इंदापूर तालुक्याच्या सर्व भागातील जनतेशी व कार्यकर्त्यांशी आगामी दोन-चार दिवसांत चर्चा करणार आहे. सध्या सगळ्या पक्षांच्या नेत्यांचे फोन येत आहेत; परंतु कोणाला होकार दिलेला नाही. तसेच उपमुख्यमंत्री देवेंद्र फडणवीस यांनाही भेटणार आहे. आगामी विधानसभा निवडणुकीत इंदापूर तालुक्यात परिवर्तन अटळ असून विधानसभा निवडणुकी संदर्भातील पुढचा निर्णय सगळ्यांना विश्वासात घेऊनच केला जाईल, अशी स्पष्ट भूमिका राष्ट्रीय सहकारी साखर कारखाना महासंघाचे अध्यक्ष, माजी मंत्री हर्षवर्धन पाटील यांनी व्यक्त केली.
बावडा येथे रत्नाई निवासस्थानी बावडा-लाखेवाडी जिल्हा परिषद गटातील जनतेशी शुक्रवारी (दि. 29) आयोजित सुसंवाद कार्यक्रमात हर्षवर्धन पाटील बोलत होते. इंदापूर तालुक्याची विस्कटलेली घडी बसवावी लागणार आहे, असे नमूद करून हर्षवर्धन पाटील यांनी इंदापूर विधानसभा निवडणूक लढवण्याचे स्पष्ट संकेत यावेळी बोलताना दिले. यावेळी अॅड. शरद जामदार, उदयसिंह पाटील, बाबा महाराज खरतोडे, डॉ. लक्ष्मण आसबे, पवनराजे घोगरे यांनी मनोगत व्यक्त केली.
यावेळी अँड.मनोहर चौधरी, अँड. कृष्णाजी यादव, मयूरसिंह पाटील, विलासराव वाघमोडे, माऊली बनकर, सत्यशील पाटील, पिंटू काळे, पराग जाधव, अशोक इजगुडे आदिसह अनेक पदाधिकारी, कार्यकर्ते, नागरिक मोठ्या संख्येने उपस्थित होते. याप्रसंगी अनेक कार्यकर्त्यांनी आपली मते व्यक्त केली, त्यावेळी काही कार्यकर्त्यांनी राम कृष्ण हरी वाजवा तुतारी अशा घोषणा दिल्या. रणजीत गिरमे यांनी आभार मानले. यावेळी कार्यकर्त्यांनी प्रचंड गर्दी केली होती.
अजित पवार जे बोलले ते महायुती धर्माचे पालन नव्हे…
इंदापूरमध्ये राष्ट्रवादी काँग्रेसच्या यात्रेत झालेल्या सभेमध्ये उपमुख्यमंत्री अजित पवार हे इंदापूर विधानसभेच्या जागे संदर्भात जे बोलले ते महायुतीच्या धर्माचे पालन करणारे नव्हते. इंदापूरच्या विधानसभेच्या जागे संदर्भात देवेंद्र फडणवीस यांचा शब्द पाळणार असे सांगणारे अजित पवार हे या सभेत महायुतीचा संकेत डावलून बोलले, त्यांना महायुतीमध्ये हा अधिकार कोणी दिला, अशी विचारणा मी अजितदादा पवार यांनाही करणार आहे. तसेच भाजपचे प्रदेशातील चंद्रशेखर बावनकुळे यांनी ज्यांना जायचे त्यांना थांबवू शकत नाही असे केलेले वक्तव्य कोणता संदर्भ घेऊन केले हे समजत नाही, कारण मी अजून कोणतेही वक्तव्य केलेले नाही, असे हर्षवर्धन पाटील यांनी नमूद केले.
