न्हावरे : शिरुर तालुक्यातील उरळगाव येथे एका वाहनचालकामुळे गंभीर अपघात घडल्याची घटना समोर आली आहे. समोरुन येणाऱ्या कारने दुचाकीला जोरदार धडक दिल्याने १८ वर्षीय तरुण गंभीर जखमी झाला असून त्याच्या उजव्या पायाला फ्रॅक्चर झाले आहे. या प्रकरणी शिरुर पोलीस ठाण्यात गुन्हा दाखल करण्यात आला आहे. याबाबत विजय रामदास सात्रस (वय ४८, रा. उरळगाव, ता. शिरुर) यांनी शिरुर पोलिस ठाण्यात दिलेल्या तक्रारीनुसार, त्यांचा मुलगा प्रणव विजय सात्रस (वय १८) हा न्हावरे येथे बाजार घेऊन घरी परत येत होता. तो त्यांच्या नावावरील हिरो स्प्लेंडर (MH 12 VU 3917) या दुचाकीवरुन तळेगाव ढमढेरे–न्हावरे रोडने जात असताना येथील पेट्रोल पंपाजवळून पुढे गेल्यानंतर अपघात घडला. Pune District: समोरुन येणाऱ्या टाटा पंच (MH 12 UC 3181) या कारचा चालक राहुल भिमाजी कोळपे (रा. उरळगाव) याने वाहतूक नियमांकडे दुर्लक्ष केल्याने दुचाकीच्या उजव्या बाजूस जोरदार धडक बसली. या अपघातात प्रणवच्या उजव्या मांडी व गुडघ्याला फ्रॅक्चर झाले असून दुचाकीचे मोठे नुकसान झाले आहे. या घटनेबाबत तसेच मोटार वाहन कायदा कलमा अन्वये गुन्हा दाखल करण्यात आला आहे. या घटनेचा पुढील अधिक तपास पोलिस हवालदार पवार हे करत आहेत. शिरुर मध्ये अपघातांचे प्रमाण वाढले…? Pune District: शिरुर तालुक्यात रात्रीच्या वेळी वेगमर्यादेचे उल्लंघन आणि वाहतूक नियमांकडे दुर्लक्ष करण्याचे प्रकार वाढत असल्याची तक्रार नागरिकांकडून होत आहे. पोलिसांची गस्त आणि कडक कारवाई न झाल्यास अशा अपघातांची मालिका थांबणार का…? असा प्रश्न उपस्थित केला जात आहे. एका क्षणाच्या निष्काळजीपणामुळे तरुणाचे आयुष्य धोक्यात आले आहे. आता प्रशासन कठोर पावले उचलणार का, याकडे सर्वांचे लक्ष लागले आहे.
