उपाध्यक्षपदी कोणाची वर्णी लागणार?

माळेगाव – माळेगाव सहकारी साखर कारखान्याच्या अध्यक्षपदासह उपाध्यक्षांची निवड उद्या शनिवार दि. ५ जुलै रोजी होणार आहे. उपाध्यक्षपदी कोणाची वर्णी लागणार, याकडे लक्ष लागले आहे. उपाध्यक्षपदी अनुभवी किंवा तरूण चेहऱ्याला संधी मिळण्याची शक्यता आहे.

माळेगाव सहकारी साखर कारखान्याच्या अध्यक्षपदासह उपाध्यक्षांची निवड उद्या शनिवार (दि.५) रोजी होणार आहे. या कारखान्याचे अध्यक्षपद आपण स्वतःकडेच ठेवणार असल्याचे उपमुख्यमंत्री अजित पवार यांनी निवडणुकीपूर्वीच जाहीर केले आहे. त्यामुळे आता अजित पवार कारखान्याचे अध्यक्ष असतील यावर शिक्कामोर्तब झाले आहे. मात्र, उपाध्यक्षपदाची माळ कुणाच्या गळ्यात पडते, याकडे सर्वांचे लक्ष लागले आहे.

निवडणुकीत उपमुख्यमंत्री अजित पवार यांनी स्वतः सहभाग घेत ‘ब’ वर्गातून उमेदवारी जाहीर केली होती. अपेक्षेप्रमाणे त्यांनी एकतर्फी विजय मिळवला. दुसरीकडे २१ पैकी २० जागांवर अजित पवार यांच्या नेतृत्वाखालील निलकंठेश्वर पॅनलच्या उमेदवारांनी विजय मिळवला. सहकार बचाव पॅनलचे प्रमुख चंद्रराव तावरे हे एकमेव विरोधी उमेदवार निवडून आले.

निलकंठेश्वर पॅनलच्या एकतर्फी विजयानंतर अजित पवारांनी माळेगावमध्ये मेळावा घेत सभासदांचे आभार मानत पुढील पाच वर्षात कारखान्याचा कायापालट करून दाखवणार असल्याचे जाहीर केले. त्याचवेळी त्यांनी पुढील पाच वर्षांचा कारभार कसा असेल यावर थेट भाष्य केले. काटकसर आणि धोरणात्मक निर्णय यावर भर देत सभासदांना सर्वाधिक दर देण्यावर आपला भर असणार असल्याचं त्यांनी स्पष्ट केले आहे.

दरम्यान, अध्यक्ष व उपाध्यक्ष निवडीचा कार्यक्रम दुपारी ३ वाजता कारखान्यावरील यशवंतराव चव्हाण सभागृहात होणार आहे. अध्यक्षपद स्वतः अजित पवार हे घेणार आहेत. त्यामुळे उपाध्यक्षपदी कुणाला संधी मिळणार याकडे सर्वांचे लक्ष लागले आहे.

पाच वर्षांत पाच उपाध्यक्षपद
अजित पवार यांच्या कार्यपद्धतीला साजेशा, सभासदांच्या प्रश्नांची जाण असलेल्या आणि सहज उपलब्ध राहू शकणाऱ्या संचालकाला उपाध्यक्षपदाची संधी मिळू शकते. कारखान्याचे अध्यक्षपद अजित पवार यांच्याकडे राहणार असल्यामुळे उपाध्यक्षपद तितक्याच जबाबदार व्यक्तीकडे देऊन कारखान्याचे कामकाज चालवले जाईल, अशी शक्यता आहे. पाच वर्षांत पाच उपाध्यक्षपदाची संधी मिळणार असल्याने यंदा उपाध्यक्षपदाची माळ कुणाच्या गळ्यात पडते, हा उत्सुकतेचा विषय ठरला आहे.