बाजार समितीमध्ये शेतकऱ्यांचा प्रतिसाद

बारामती : बारामती कृषी उत्पन्न बाजार समितीचे मुख्य बाजार आवारात चालु आठवड्यात मकाची २१ हजार पोत्यांची उच्चांकी, अशी आवक होऊन मकेला कमाल २३५१ रुपये तर सरासरी प्रति क्विंटल २१७५ रुपये दर मिळाला. शेतमालाचे लिलावापूर्वी इलेक्ट्रॉनिक वजनकाट्यावर अचूक वजन, त्याच दिवशी पट्टी व योग्य बाजारभाव यामुळे शेतमालाची आवक मोठ्या प्रमाणात बारामती बाजार आवारात होत आहे.

यावर्षी पाऊस समाधानकारक झाला असल्याने मक्क्याची लागवड मोठ्या प्रमाणात झाली असल्याने बारामतीसह आसपासच्या तालुक्यातुन मकेची आवक होत असल्याची माहिती समितीचे सचिव अरविंद जगताप यांनी दिली. मुख्य आवारात आडतदार म्हणून वैभव शिंदे, बाळासाहेब फराटे, शिवाजी फाळके, प्रशांत शहा, अशोक सालपे, सचिव सातव, संतोष मासाळ, दीपक मचाले यांचे आडतीवर मोठ्या प्रमाणात मकेची आवक झाली आहे. सतीश गावडे, अशोक भळगट, दीपक मचाले, मोरे हे खरेदीदार आहेत.

बारामती बाजार आवारात मकेबरोबर इतर भुसार मालाची आवक होत असून त्यामध्ये प्रामुख्याने बाजरी, गहू, ज्वारी, खपली, हरभरा, उडीद, मूग आदी शेतमाल विक्रीसाठी येत आहेत. आवारात बाजरीची ११६८ नगाची आवक होऊन बाजरीस कमाल ३४०० रुपये तर किमान २८०० रुपये प्रति क्विंटल दर मिळाला. उडीदाला कमाल ८००० रुपये, गव्हाला कमाल ३४०१ रुपये तर किमान २९०० रुपये आणि ज्वारीला कमाल ३८०१ रुपये व सरासरी २९०० रुपये, हरभ-याचे कमाल ६४२० रुपये दर निघाले.

बाजार आवारात शेतमालाला चांगला दर मिळत असल्याने शेतक-यांनी आपला शेतमाल बारामती बाजार समितीमध्ये विक्रीस आणावा, असे आवाहन समितीतर्फे करण्यात आले आहे.