शिक्रापूर : शिक्रापूर ता. शिरुर येथील वाबळेवाडी येथे एका इसमाने वीज कनेक्शन नसताना देखील त्याच्या व्यवसायासाठी वर्षभर अनधिकृतपणे वीज कनेक्शन वीजचोरी केल्याचे उघड झाले.

शिक्रापूर पोलीस स्टेशन येथे अक्षय उत्तम वाबळे (रा. वाबळेवाडी शिक्रापूर) याच्या विरुद्ध गुन्हा दाखल करण्यात आला आहे. वाबळेवाडी परिसरात विद्युत वितरण विभाग भरारी पथकाचे प्रमुख अतिरिक्त कार्यकारी अभियंता दीपक कोथळे, सुरक्षा अधिकारी विजय गडसिंग, वरिष्ठ तंत्रज्ञ विनोद देवणे,

जयकुमार गावडे आदी वीज कनेक्शनची पाहणी करीत असताना अक्षय वाबळे यांच्या व्यवसाय ठिकाणी कोणतेही वीज कनेक्शन नसताना वीज पुरवठा सुरु असल्याचे निदर्शनास आले. दरम्यान, चौकशी केली असता, अक्षय वाबळे यांनी वर्षभरापासून अनधिकृतपणे विजेचा वापर केल्याचे उघड झाले,

यावेळी महावितरणच्या भरारी पथकाने केबल जप्त करीत घटनास्थळी पंचनामा केला. याबाबत अतिरिक्त कार्यकारी अभियंता दीपक श्रीमंतराव कोथळे यांनी शिक्रापूर पोलीस स्टेशन येथे फिर्याद दिली आहे.

पुढील तपास पोलीस निरीक्षक दिपरतन गायकवाड यांच्या मार्गदर्शनाखाली सहायक पोलीस उपनिरीक्षक आजिनाथ शिंदे हे करीत आहेत.