Pune Dead Marriage Divorce News – दोघेही सज्ञान.. दोघांनी घरच्यांच्या परस्पर लग्न केले. मात्र, एकही दिवस संसार केला नाही. दोघे आपापल्याच घरी राहात होते. दोघांच्या घरात रूढी परंपरा पाळल्या जात असल्यामुळे लग्नाचा निर्णय चुकला असे दोघांना वाटले. दरम्यान करोनाच्या काळात काही कारणास्तव तरुणाने तरुणीला सात लाखांची मदत केली होती. त्यानंतर तरुणीने घटस्फोटासाठी अर्ज दाखल केल्यानंतर तरुणाने गरजेपोटी तिला दिलेल्या पैशाची मागणी केली. तिने पैसे देण्याचे मान्य करून सात लाख रुपये दिल्यावर दोघांचा परस्परसंमतीने घटस्फोट मंजूर झाला. तब्ब्ल सात वर्षांनी डेड मॅरेजमधून दोघांची सुटका झाली.

स्मिता आणि राकेश ( नाव बदललेले) या दोघांनी २०१८ मध्ये घरच्यांना न सांगता आंतरजातीय नोंदणी पद्धतीने विवाह केला. त्यामुळे लग्न झाल्यावर दोघे आपापल्या घरीच राहात होते. त्यानंतर दोघांनाही एकमेकांच्या घरातील रूढी परंपरा कळल्यावर त्यांना कळून चुकले की लग्नाचा निर्णय चुकीचा होता. त्यामुळे दोघांनी परस्पर संमतीने घटस्फोट घेण्याचा निर्णय घेतला.

२०२० मध्ये करोनाच्या काळात दोघांनी घटस्फोटासाठी अर्ज दाखल केला. परंतु केस दाखल केल्यानंतर दोघेही न्यायालयात गेलेच नाहीत. त्यामुळे घटस्फोटाची केस काढून टाकण्यात आली. दरम्यानच्या काळात दोघांचे बोलणे चालू होते. स्मिताला काही कारणासाठी पैशाची गरज होती. राकेशने त्यांच्या मैत्रीखातर स्मिताला ७ लाख रुपयांची मदत केली.

घटस्फोट घेण्याचा दोघांचा निर्णय पक्का होता. त्यामुळे २०२४ मध्ये स्मिताने घटस्फोटाची केस दाखल केली. या घटस्फोटाच्या प्रकरणात अॅड. राणी माणिक कांबळे-सोनावणे स्मितातर्फे न्यायालयात हजर झाल्या. त्यांनी दोघांशी चर्चा करून परसपर समजुतीने प्रकरण मिटविले. राकेशला त्याने दिलेल्या पैशांची गरज होती. ही रक्कम स्मिताने देण्याचे मान्य केले आणि रक्कम राकेशला दिल्यावर दोघांचा परस्पर संमतीने घटस्फोट कौटुंबिक न्यायालयाने २१ फेब्रुवारी रोजी मंजूर केला.

“परस्पर समजूतीने घटस्फोट घेणे हे दोन्ही पक्षकारांच्या फायद्याचेच असते. या केस मध्ये दोघांना घटस्फोट घ्यायचाच होता. कारण लग्नानंतर ते एकत्र राहिलेच नाही. नवऱ्याला त्याने बायकोला दिलेली रक्कम हवी होती. ती परत केल्यामुळेच घटस्फोट होऊ शकला. एकत्र न राहिल्या मुळे दोघांचे लग्न हे डेड मँरेज होते.” – अॅड. राणी माणिक कांबळे -सोनावणे, पत्नीच्या वकील