पुणे – महाराष्ट्र लोकसेवा आयोगाची उद्या (रविवार) महाराष्ट्र गट ब (अराजपत्रीत) सेवा संयुक्त पुर्व परिक्षा घेण्यात येणार आहे. या परिक्षेपूर्वी नाशिक आणि पुणे जिल्हयातील विद्यार्थ्यांना प्रश्नपत्रिका व उत्तरपत्रिका ४० लाखात देतो असे कॉल येत होते. यामुळे विद्यार्थ्यांमध्ये पेपर फुटला असल्याची चर्चा सुरु झाली होती. याची दखल घेत लोकसेवा आयोगाने पुणे पोलिसांकडे तक्रार दाखल केली होती. त्या अनुषंगाने पुणे पोलिसांनी दोन तरुणांना अटक केली आहे. तर नागपूर पोलिसांच्या मदतीने एका तरुणाला ताब्यात घेतले आहे. त्यांच्याकडे विद्यार्थ्यांची फोन नंबरसहीत यादी सापडली आहे.

उपायुक्त (गुन्हे) निखील पिंगळे यांनी सांगितले की, दिपक दयाराम गायधने ( २६ रा. चाकण, मुळ तामसवाडी,जि. भंडार) आणि सुमित कैलास जाधव ( २३ रा., चाकण, मुळगाव नांदगाव, जि. नाशिक) अशी अटक आरोपींची नावे आहेत. तर योगेश सुरेंद्र वाघमारे (रा. सोनाली ता. वराठी, जि. भंडारा) याला ताब्यात घेण्यात आले. गायधने आणि जाधव हे म्हाळुंगे एमआयडीसीमध्ये टेक्निशिअन म्हणून काम करतात. तर वाघमारे हाही आयटीआय झाला आहे.

गायधने आणि जाधवला ताब्यात घेतल्यावर त्यांनी वाघमारे याने २४ उमेदवारांची यादी दिल्याचे सांगितले. त्यानूसार नागपूर पोलिसांच्या मदतीने वाघमारेला ताब्यात घेण्यात आले. पुणे पोलिसांचे पथक त्याला पुण्यात घेऊन येत आहे. एम.पी.एस.सी परिक्षेची प्रश्नप्रत्रिका ४० लाख रुपयांच्या बदल्यात आदल्या दिवशी उपलब्ध करुन देण्यासाठी विदयार्थ्यांना अमिष दाखविणारे फोन कॉल करणे. विदयार्थी , पालक व सामान्य लोकांमध्ये संभ्रम व भिती पसरवणे तसेच परिक्षा प्रक्रियेमध्ये अडथळा आणण्याचा व फसवणुक करण्याचा प्रयत्न केला म्हणुन बंडगार्डन पोलीस ठाण्यात गुन्हा दाखल करण्यात आला आहे.

या गुन्हयाचा तपास सहायक पोलीस आयुक्त (गुन्हे) राजेंद्र मुळीक हे करीत आहेत. यातील आरोपींकडे नाशिक येथील २४ उमेदवाराची यादी तसेच नागपूर मधील संशयितांकडे काही याद्या कशा प्राप्त झाल्या आहेत. या यादीतील उमेदवार यावर्षी परिक्षेला बसलेले आहेत का ? याबाबत तपास सुरु आहे. अद्यापर्यंतच्या तपासात पेपर फुटल्याचे निष्पन्न झालेले नाही. याप्रकरणाचा तपास हा पोलीस आयुक्त अमितेश कुमार यांच्या मार्गदर्शनाखाली सुरु आहे.

परिक्षेला बसलेल्या विद्यार्थ्यांची यादी खासगी क्लासचालकांनी दिली आहे का? याचाही तपास केला जात आहे. आरोपींपैकी एकही पदवीधर नाही. यामुळे त्यांना एमपीएससी परिक्षेचा कोणताही अनुभव नाही. यामुळे खरा सुत्रधार वेगळाच असल्याची शक्यता पोलिसांनी वर्तवली आहे.