Pune Crime – विवाह विषयक संकेतस्थळावरील ओळखीतून एकाने तरुणीला २१ लाखांचा गंडा घातला. फसवणूक झाल्याचे लक्षात आल्यानंतर तरुणीने पैसे मागितल्यावर खेळण्यातील नोटा असलेली पन्नास लाखांची बॅग हवाली केली. याप्रकरणी ३२ वर्षीय तरुणीने सिंहगड रोड पोलिस ठाण्यात दिलेल्या फिर्यादीनुसार गोरखनाथ गावंडकर (रा. कडसुरे, रायगड) याला अटक केली आहे. त्याला न्यायालयाने १३ मे पर्यंत पोलीस कोठडी दिली आहे. फिर्यादीनुसार तरुणी घटस्फोटीत असून गोरखनाथशी मार्च २०२५ मध्ये विवाह विषयक संकेतस्थळाच्या माध्यमातून परिचय झाला. त्याने तरुणीला लग्नाचे आमिष दाखवून विश्र्वास संपादन केला. आपण आर्थिक अडचणीत असून, पैशाची गरज आहे असे सांगून वेळोवेळी २१ लाख रुपये उकळले. काही दिवसानंतर आपली फसवणूक होत असल्याची चाहूल लागल्यावर तिने गोरखनाथकडे पैसे मागितले. १५ फेब्रुवारी गोरखनाथ पुण्यात आला असता तरुणीला सिंहगड रोडवरील एका हॉटेलबाहेर भेटायाला बोलावले. त्याने एक काळ्या रंगाची बॅग आणली होती. त्याने सांगितले बॅगेत पन्नास लाख असून तुझे २१ लाख रुपये घे, आणि राहिलेले पैसे मला आरटीजीएसद्वारे पाठवून दे. त्यानंतर गोरखनाथ तेथून निघून गेला. बॅगेला लॉक होते. त्यामुळे तरुणीने तेथे जागेवर उघडून पाहिली नाही. तिला वाटले त्याने पैसे परत केले आहेत. जेव्हा तरुणीने बॅग उघडून पाहिली तेव्हा त्यामध्ये खेळण्यातील नोटा आढळल्या. त्यानंतर तरुणीने तक्रार दिल्यावर पोलिसांनी रविवारी आरोपीस अटक केली. याप्रकरणाचा तपास वरिष्ठ पोलिस निरीक्षक विनय पाटणकर यांच्या मार्गदर्शनाखाली सहायक पोलिस निरीक्षक समीर कदम करीत आहेत.
