Pune Crime – अल्पवयीन तरुणीबरोबर असलेल्या प्रेमसंबंधाला विरोध करून नातेवाईकांनी एका तरुणाला दांडक्याने बेदम मारहाण करून त्याचा खून केला. हा धक्कादायक प्रकार कोथरूड भागात मेगा सिटी इमारतीत घडला आहे. याप्रकरणी कोथरूड पोलिसांनी दहा जणांविरुद्ध गुन्हा दाखल केला आहे. नागेश संजय जाधव (वय २३, रा. जुनी वडारवाडी, मंजाळकर चौक, शिवाजीनगर) असे खून झालेल्या तरुणाचे नाव आहे. याबाबत त्याची आई सुरेखा (वय ४५, रा. जुनी वडारवाडी) यांनी फिर्याद दिली आहे. याप्रकरणी पोलिसांनी ५ महिलांसह १० जणांवर गुन्हा दाखल केला आहे. पोलिसांनी दिलेल्या माहितीनुसार, नागेश जाधव हा शिवाजीनगर येथील एका खासगी कार्यालयात ऑफिस बॉय म्हणून काम करत होता. पौड फाटा चौक परिसरातील मेगा सिटी इमारतीत राहणाऱ्या एका तरुणीशी त्याचे प्रेमसबंध होते. प्रेमसंबधाला तरुणीच्या नातेवाईकांनी विरोध केला होता. शनिवारी (१४ मार्च) सायंकाळी सव्वासातच्या सुमारास नागेश याच्या मोबाइल क्रमांकावर संपर्क साधून तरुणीच्या नातेवाईकांनी त्याला पौड फाटा चौक परिसरात असलेल्या मेगा सिटी इमारतीत बोलावून घेतले. त्यानंतर नागेश दुचाकीवरून तेथे गेला. त्यानंतर रात्री आठच्या सुमारास आरोपींनी नागेशच्या आईच्या मोबाइल क्रमांकावर संपर्क साधून तुमच्या मुलाला आम्ही मारले आहे. दहा मिनिटांत मुलाला घेऊन जा; अन्यथा त्याला आम्ही इमारतीतून फेकून देऊ, अशी धमकी दिली. त्यानंतर आरोपींनी मोबाइल क्रमांक बंद केला. नागेशची आई घाबरली. त्या कर्वे रस्त्यावरील मेगा सिटी इमारतीच्या आवारात गेल्या. त्यांनी रहिवाशांकडे विचारणा केली. तेव्हा नागेशला मेगा सिटी इमारतीच्या गच्चीवर आरोपी मारहाण करत असल्याचे आईने पाहिले. नागेश गंभीर जखमी झाला होता. त्याने आईला मारहाणीबाबत माहिती दिली. नागेशला तातडीने खासगी रुग्णालयात दाखल करण्यासाठी त्याला घेउन त्या रिक्षाने निघाल्या. माझे एका मुलीशी प्रेमसंबंध आहेत, असे नागेशने आईला सांगितले. त्या मुलीने मेगा सिटी परिसरात बोलावून घेतले. तिची आई, काकू, तसेच नातेवाईकांनी नागेशला दांडक्याने मारहाण केल्याने तो गंभीर जखमी झाल्याचे नागेशच्या आईने दिलेल्या फिर्यादीत म्हटले आहे. नागेशला खासगी रुग्णलायातून ससून रुग्णालयात दाखल करण्यात आले. मात्र, उपचारादरम्यान त्याचा मृत्यू झाला. गुन्हे शाखेचे पोलीस निरीक्षक अनिल माने तपास करत आहेत.
