पुणे : मद्य सेवन करण्यासाठी पैसे न दिल्याने पत्नीच्या चेहऱ्यावर पतीने उकळते तेल टाकल्याची घटना हडपसर भागात घडली. महिलेचा चेहरा, गळ्याला भाजले असून, पतीविरुद्ध हडपसर पाेलिसांनी गुन्हा दाखल केला. रुपाली गणेश परदेशी (वय ३५, रा. नवीन म्हाडा वसाहत, वैदुवाडी, हडपसर) असे जखमी झालेल्या महिलेचे नाव आहे. या प्रकरणी पती गणेश धनराज परदेशी (वय ४२) याच्याविरुद्ध गुन्हा दाखल करण्यात आला आहे. रुपाली परदेशी यांनी याबाबत हडपसर पोलीस ठाण्यात फिर्याद दिली आहे. आरोपी गणेश याला मद्य सेवनाचे व्यसन आहे. त्याने रुपाली यांच्याकडे मद्य सेवनासाठी पैसे मागितले होते. मंगळवारी (दि.२३) सकाळी रुपाली आणि दोन लहान मुले घरात होते. रुपालीने पैसे न दिल्याने त्याने कडईतील उकळते त्यांच्या चेहऱ्यावर टाकले. उकळत्या तेलामुळे रुपाली यांचा चेहरा, मान, गळा भाजला असून, त्यांच्यावर उपचार सुरू आहेत. पोलीस उपनिरीक्षक कवीराज पाटील तपास करत आहेत.
