Pune Crime News: रक्ताचे डाग धुवून कॅफे पुन्हा सुरू; पुरावा नष्ट केल्याप्रकरणी मालकासह दोघांना अटक
Pune Crime News: फ्लाईंग जिप्सी कॅफेतील हल्ला प्रकरण; आरोपींना २२ ऑगस्टपर्यंत पोलीस कोठडी
पुणे: डेक्कन परिसरातील फ्लाईंग जिप्सी कॅफेत रीलस्टार तरुणावर कोयत्याने हल्ला केल्यानंतर घटनास्थळी सांडलेले रक्त पाण्याने धुवून पुरावा नष्ट केल्याप्रकरणी कॅफे मालकासह व्यवस्थापकाला डेक्कन पोलिसांनी अटक केली आहे.
हेमंत आनंद पाटील (वय ४१, रा. घोले रोड, शिवाजीनगर) आणि प्रेम दीपक पाटील (रा. घोले रोड, शिवाजीनगर) अशी अटक केलेल्यांची नावे आहेत. दोघांना न्यायालयाने २२ ऑगस्टपर्यंत पोलीस कोठडी सुनावली आहे.
१५ ऑगस्टला पहाटे साडेतीनच्या सुमारास फ्लाईंग जिप्सी कॅफेत रीलस्टार अथर्व जगताप (१९, रा. आंबेगाव) याच्यावर कोयत्यासह धारदार शस्त्रांनी हल्ला करण्यात आला होता. या प्रकरणात दोन तरुणींसह सात जणांना यापूर्वीच अटक करण्यात आली असून एका अल्पवयीनाला ताब्यात घेण्यात आले आहे.
हल्ल्यानंतर अथर्व जखमी होऊन कॅफेतच कोसळला. त्यावेळी फरशीवर पडलेले रक्त कॅफे मालक आणि व्यवस्थापकाने पाण्याने धुवून टाकल्याचे तपासात समोर आले आहे. तसेच, कॅफेतील सीसीटीव्ही फुटेज देण्यास टाळाटाळ करण्यात आल्याचेही पोलिसांच्या तपासात निष्पन्न झाले आहे. घटनास्थळावरील पुरावा नष्ट करण्याचा प्रयत्न केल्याप्रकरणी पोलिसांनी भारतीय न्याय संहितेच्या कलम २३८ अंतर्गत कारवाई केली आहे.
रक्ताचे डाग धुवून कॅफे पुन्हा सुरू
वरिष्ठ पोलीस निरीक्षक रूणाल मुल्ला यांनी दिलेल्या माहितीनुसार, हल्ल्याची घटना घडल्यानंतर घटनास्थळ जसेच्या तसे ठेवणे आणि पोलिसांना माहिती देणे कॅफे व्यवस्थापनाचे कर्तव्य होते. मात्र, रक्ताचे डाग धुवून कॅफे पुन्हा सुरू करण्यात आल्याचे तपासात स्पष्ट झाले. त्यामुळे मालक आणि व्यवस्थापकाला अटक करण्यात आली.
दरम्यान, कॅफे बंगल्याच्या आवारात सुरू करण्यात आल्याने तसेच आवश्यक परवानग्यांचा अभाव असल्याचेही पोलिसांच्या निदर्शनास आले आहे. कॅफे निर्धारित वेळेपेक्षा अधिक वेळ सुरू ठेवण्यात येत असल्याची बाबही समोर आली असून, संबंधित आस्थापना सील करण्याबाबत पोलिसांनी महापालिकेला पत्र दिले आहे.
या प्रकरणाची पोलीस आयुक्त अमितेशकुमार यांनी गंभीर दखल घेत तपासाचा आढावा घेतला होता. त्यानंतर पुरावा नष्ट केल्याप्रकरणी कॅफे मालक आणि व्यवस्थापकावर कारवाई करण्यात आली आहे.
हल्ल्यानंतर कॅफेतील रक्त धुतले
फ्लाईंग जिप्सी कॅफेत रीलस्टार तरुणावर कोयत्याने हल्ला झाल्यानंतर फरशीवर पडलेले रक्त कॅफे व्यवस्थापनाने धुवून टाकल्याचे पोलिसांच्या तपासात उघडकीस आले. घटनास्थळावरील पुरावा नष्ट केल्याप्रकरणी दोघांवर कारवाई करण्यात आली आहे. यापूर्वीही कॅफेच्या नियमबाह्य कारभाराबाबत तक्रारी आणि गुन्हे दाखल झाल्याची माहिती पोलिसांनी दिली आहे.
