पुणे – घरात घुसून अल्पवयीन मुलीवर बलात्कार करणाऱ्याला विशेष न्यायाधीश एस.आर. साळुंखे यांनी दणका दिला आहे. २० वर्षे सक्तमजुरी आणि १० हजार रुपये दंडाची शिक्षा सुनावली. दंड न भरल्यास त्याला अतिरिक्त तीन महिने कारावास भोगावा लागणार आहे.

भिमराव मुकिंदा कांबळे (वय २७, मूळ. रा. सांडस, ता. कळमनरू, जि. हिंगोली) असे शिक्षा झालेल्याचे नाव आहे. याबाबत पीडित १४ वर्षीय मुलीन हडपसर पोलिसात फिर्याद दिली आहे. ही घटना डिसेंबर २०१७ मध्ये घडली. या प्रकरणात सरकारी पक्षातर्फे अतिरिक्त सरकारी वकील विलास घोगरे पाटील यांनी काम पाहिले. त्यांनी ८ साक्षीदार तपासले. त्यामध्ये पीडितेची साक्ष महत्त्वाची ठरली.

सहायक पोलीस निरीक्षक कल्याणी शिंदे यांनी तपास करून दोषारोपपत्र दाखल केले. न्यायालय अंमलदार ए.जे.गोसावी यांनी न्यायालयीन कामकाजासाठी मदत केली. पीडितेच्या घराशेजारी असलेल्या एका पोल्ट्रीमध्ये भिमराव काम करायचा. घटनेच्या दिवशी पीडिता घरात एकटी असल्याचा व लाईट गेल्याचा फायदा घेऊन भिमराव घरात घुसला. मारहाण करत आणि जीवे ठार मारण्याची धमकी देत तिच्यावर बलात्कार केला. घटनेबाबत कोणाला सांगू नये, यासाठीही तिच्यावर दबाव आणला होता. मात्र,पीडिता गर्भवती राहिल्यानंतर हा प्रकार उघडकीस आला.