Pune Crime – दुनिया झुकती है, झुकानेवाला चाहिये, या वाक्यप्रचाराच्या धर्तीवर फसणारे आहेत, चलाख फसवणारे पाहिजेत, असे म्हणता येईल. एखाद्याला किरकोळ कारणाखाली कल्पकतेने कसे फसवता येते याचे एक उत्तम उदाहरण उघड झाले आहे. ड्रेनेज लाईन दुरुस्तीच्या बहाण्याने एका चलाख गुन्हेगाराने नारायण पेठेतील एका ज्येष्ठाची थोडी थोडकी नव्हे तर तब्बल ६ कोटी ७० लाख ३७ हजार ५०० रुपयांची फसवणूक केली आहे. विश्रामबाग पोलिसात दिलेल्या फिर्यादीनुसार गुन्हेगाराने संदिप चव्हाण, आदित्य चव्हाण, जितेन सोळंकी, शर्मा, महाजन, राउत नावांचा आणि बँक मॅनेजर, जज, पोलीस अधिकारी रुपांचा वापर करत वेळोवेळी वरील रक्कम आपल्या खात्यात जमा करण्यास भाग पाडले. फिर्यादी सिरम इन्स्टिट्यूटमधील सेवानिवृत्त वरिष्ठ अधिकारी असून गुन्हेगाराने वर्षभर त्यांना मानसिक दबावाखाली ठेवले. फिर्यादीच्या आईच्या नावावर नवी पेठेत घर असून तेथे भाडेकरू राहतात. २८ एप्रिल २०२४ रोजी भाडेकरूने फोनवर एकजण ड्रेनेज तपासणीस आल्याची माहिती दिली. फिर्यादी जेव्हा त्यांच्याशी फोनवर बोलले तेव्हा त्याने आपले नाव संदिप चव्हाण असे सांगितले. सोसायटीची तक्रार असून त्यानुसार ड्रेनेजची तपासणीसाठी आलो असल्याचे त्याने सांगितले. ड्रेनेजमध्ये झाडांची मुळे गेल्यामुळे मेन ड्रेनेज लाईनपर्यत स्वतंत्र लाईन टाकावी लागेल असे सांगितले. त्याने महापालिकेचा अधिकारी असल्याची बतावणी केली. आर्थिक फसवणूक या कामासाठी ६५ हजार आणि साहित्य व मशिनरीसाठी वेगळा खर्च होईल असे सांगितले. कधी साहित्य, मशीन डिपॉझीट, एमएसईबी केबल शिफ्टींग, विविध विभागाचे चलन आदी कारणांसाठी त्याने १५ लाख, ,९ लाख ९९ हजार, ८ लाख ७६ हजार असे पैसे घेतले. मशीन डिपॉझीट आणि चलनासाठीचे काही पैसे परत मिळतील असे सांगितले होते. यानंतर फिर्यादींना पोलीस उपनिरीक्षक बोलत असल्याचा फोन आला. त्याने संदिपने घोळ घातला असून त्याला ठाम्यात आणल्याचे सांगितले. त्याचा वकील, त्याचा भाऊ आदित्य चव्हाणशी बोलण्यास सांगितले. आदित्यने आता संदिप बोलणार नाही मीच बोलेने आणि तुमचे डिपॉझीटचे पैसे मिळवून देतो, असे सांगितले. त्यानंतर आदित्य, अनिल चव्हाण, सोलंकी, शर्मा, कदम, राउत असे वेगवेगळया नावांनी फिर्यादीशी बोलत होते. वेगवेगळ्या कारणांनी भिती घालून पैसे घ्यायचे. एकदा न्यायाधीश बोलतोय असा फोन करून पुन्हा पैसे घेतले. मनी ट्रान्सफर, सर्व्हिस चार्ज, बँक खात्यामध्ये बॅलन्स मेन्टेन करणे, तसेच संदिपच्या मुलाचे ऑपरेशन, नंतर वेगवेगळ्या नावाने नातेवाईक वारल्याचे कारणे सांगत ब्लॅकमेल करुन पैसे घेतले. फिर्यादीकडून जून २०२५ पर्यंत ६ कोटी १६ लाख १३ हजार ३००६ कोटी ७० लाख ३७ हजार उकळले. याचा तपास आर्थिक गुन्हे शाखेचे सहायक पोलीस निरीक्षक दादासाहेब पाटील करत आहेत. विविध बँकांत जमा झालेले पैसे -बँक ऑफ महाराष्ट्र – ९४,५१,५०० -सारस्वत बँक, औंध – ४,९१,३२,५०० -सुर्योदय स्मॉल फायनान्स – ७३,८७,५०० -विश्वेश्वर सहकारी बँक – ४,००,००० -एकूण रक्कम — ६,७०,३७,५००
