Pune Crime – जामखेड येथे गोळीबार झालेल्या कुख्यात गुंड सागर मोहोळकर याचा सोमवारी (दि. १६) ससून रुग्णालयात मृत्यू झाला. त्याच्यावर ४ मार्च रोजी अज्ञात हल्लेखोरांनी गावठी कट्ट्यातून गोळीबार केला होता. यामध्ये त्याला चार गोळ्या लागल्याने गंभीर उपचारासाठी येथील ससून रुग्णालयात हलविण्यात आले होते. यामागे पुण्यातील कुख्यात गुंड नीलेश घायवळ याचा काही संबंध असल्याचा संशय व्यक्त करण्यात येत आहे. मोहोळकर याने काही महिन्यांपूर्वी कुस्तीच्या एका फडात नीलेश घायवळ याच्या कानशीलात लगावलेली होती. या जुन्या वादातून हल्ला झाला असण्याची शक्यता पोलिसांकडून तपासली जात आहे. जामखेडमधील नुरानी कॉलनी रस्त्यावर ४ मार्च रोजी सायंकाळी साडेसात ते पावणेआठच्या सुमारास गोळीबाराची घटना घडली. मोहोळकर उभा असताना दुचाकीवरून आलेल्या अज्ञातांनी अचानक गोळीबार केला. हल्लेखोरांनी सलग पाच ते सहा राऊंड फायर केल्याची माहिती आहे. अचानक झालेल्या गोळीबारामुळे परिसरात एकच गोंधळ उडाला. गोळ्या लागल्यानंतर मोहोळकर रस्त्यावर कोसळला. त्यानंतर हल्लेखोरांनी घटनास्थळावरून तात्काळ पलायन केले. घटनेची माहिती मिळताच पोलीस निरीक्षक दशरथ चौधरी पथकासह घटनास्थळी दाखल झाले आणि परिसराची नाकाबंदी करण्यात आली. मोहोळकरला प्रथम जामखेडमधील खासगी रुग्णालयात दाखल केले. त्याची प्रकृती गंभीर असल्याने पुढील उपचारासाठी अहिल्यानगर जिल्हा रुग्णालयात हलविण्यात आले. मात्र प्रकृती आणखी बिघडल्याने त्याला ससून रुग्णालयात उपचारार्थ पाठविण्यात आले. मात्र, तेथे उपचार सुरू असताना त्याचा मृत्यू झाला.
