प्रभात वृत्तसेवा पुणे – मोटार अपघात न्यायप्राधिकरणाने दिलेल्या आदेशानुसार नुकसान भरपाई देण्यास टाळाटाळ करणे रिलायन्स जनरल इन्शुअरन्स कंपनीला महागात पडले आहे. रिलायन्सच्या पुणे, मुंबई कार्यालयातील जंगम मालमत्ता जप्तीचे आदेश मोटार अपघात न्यायप्राधिकरणाचे सदस्य सत्र न्यायाधीश बी.डी.कुलकर्णी यांनी दिले आहेत. या प्रकरणी अर्जदारातर्फे ॲड. मजहर मुजावर आणि ॲड. प्रमोद धुळे यांनी काम पाहिले. अर्जदार सिद्रा युसुफ शेख यांनी पतीचा अपघाती मृत्यू झाल्याने न्यायप्राधिकरणात ॲड. मजहर मुजावर आणि ॲड. प्रमोद धुळे यांच्यामार्फत रिलायन्स जनरल इन्शुअरन्स विरोधात दावा दाखल केला होता. सुनावणीनंतर २६ लाख १५ हजार ५०० रुपये नुकसान भरपाई वार्षिक ७.५ टक्के व्याजाने देण्याचा आदेश न्यायप्राधिकरणाने १७ मार्च २०२५ रोजी दिला. व्याजासह ही रक्कम ३० लाख ७२ हजार २४७ होते. विमा कंपनीने याची अंमलबजावणी केली नाही. तसेच, वरच्या न्यायालयात अपीलही केले नाही. त्यामुळे अर्जदारानी निकालाच्या अमलबजावणीसाठी कोर्टात दाद मागितली. दोन्ही बाजुचा युक्तीवाद ऐकल्यानंतर न्यायालयाने वरील आदेश दिला.
