Pune News : आई-बाबांच्या संसाराच्या वाटा वेगळ्या झाल्या, तरी त्यांच्या वादाची किंमत चिमुकल्याने का मोजावी? बाबांची माया आणि आजी-आजोबांच्या प्रेमाची ऊब त्याच्यापासून हिरावली जाऊ नये, या भूमिकेतून न्यायालयाने महत्त्वपूर्ण आदेश दिला आहे. (Pune News)

साडेचार वर्षांच्या चिमुकल्याला दर आठवड्यातील तीन दिवस वडील आणि आजी-आजोबांसोबत मुक्काम करण्याची परवानगी प्रथमवर्ग न्यायदंडाधिकारी दीप्ती डी. पाटील यांनी दिली. (Pune News)

कोमलिका आणि अनुराग (सर्वांची नावे बदललेली) मागील दीड वर्षापासून वेगळे राहत आहेत. त्यांचा मुलगा भावेश यापूर्वी दर आठवड्यातील तीन दिवस वडील आणि आजी-आजोबांकडे जात होता. मात्र, न्यायालयीन प्रकरण सुरू झाल्यानंतर या भेटी थांबल्याचे वडिलांच्या बाजूने सांगण्यात आले. (Pune News)

त्यामुळे मुलाला पूर्वीप्रमाणे आपला सहवास मिळावा, यासाठी वडील आणि आजी-आजोबांनी ॲड. राणी ढाकणे आणि ॲड. विजयकुमार ढाकणे यांच्यामार्फत न्यायालयात अर्ज केला. ॲड. ढाकणे यांना ॲड. सारिका पोटभरे, ॲड. कौस्तुभ नळे, ॲड. तपस्या देवकर आणि ॲड. मानसी गायकवाड यांनी सहकार्य केले. (Pune News)

आईने मुलाच्या आरोग्य आणि सुरक्षिततेबाबत आक्षेप घेत या मागणीला विरोध केला. दोन्ही बाजूंचे म्हणणे ऐकल्यानंतर न्यायालयाने मुलाचे वय, शाळेचे वेळापत्रक आणि एकूण हित विचारात घेतले. (Pune News)

वडिलांकडे रात्री मुक्काम केल्याने मुलाच्या हिताला बाधा पोहोचेल, असा निष्कर्ष काढण्यासाठी सध्याच्या टप्प्यावर पुरेशी सामग्री नसल्याचे न्यायालयाने नमूद केले. त्यानुसार, आठवड्यातील तीन दिवस मुलाला वडील आणि आजी-आजोबांच्या घरी राहण्याची मुभा देण्यात आली. या काळात त्याची सुरक्षितता, आरोग्य, शिक्षण, विश्रांती आणि सर्वांगीण हिताची काळजी घेण्याचे निर्देशही न्यायालयाने दिले. (Pune News)

‘ताबा’ नाकारला म्हणजे ‘भेट’ही नाकारली असे नाही

मुलाच्या ताब्यासाठी यापूर्वी करण्यात आलेला अर्ज न्यायालयाने फेटाळला होता. त्याचा आधार घेत भेटीच्या मागणीला आईच्या बाजूने विरोध करण्यात आला. मात्र, ‘मुलाचा ताबा’ आणि ‘मुलाला भेटण्याचा अधिकार’ या स्वतंत्र बाबी असल्याचे न्यायालयाने स्पष्ट केले. (Pune News)

त्यामुळे आधी ताब्याचा अर्ज फेटाळल्याने भेटीच्या मागणीचा स्वतंत्रपणे विचार करण्यास अडथळा येत नसल्याचे आदेशात नमूद करण्यात आले. शुक्रवार ते रविवार असा सलग तीन दिवसांचा सहवास मुलाला वडिलांसोबत अर्थपूर्ण आणि अखंड वेळ घालविण्याची संधी देईल, असेही न्यायालयाने म्हटले आहे. (Pune News)

वैवाहिक वादाचा परिणाम मुलाच्या वडील आणि आजी-आजोबांशी असलेल्या नात्यावर होऊ नये. मुलाच्या भावनिक जडणघडणीसाठी त्यांचा सहवासही महत्त्वाचा आहे. घरगुती हिंसाचार कायद्याच्या कलम २१ अंतर्गत न्यायालय मुलाच्या हिताचा विचार करून वडिलांना भेटीसह रात्रीच्या मुक्कामाचा अधिकार देऊ शकते. त्यामुळे आठवड्यातील तीन दिवसांचा ‘ओव्हरनाईट व्हिजिटेशन’चा हा महत्त्वपूर्ण आदेश आहे.
– ॲड. राणी व ॲड. विजयकुमार ढाकणे, पतीच्या वकील

Supreme Court : ‘या’ बंडखोर खासदारांना मोठा दिलासा; अपात्रतेच्या कारवाईला पुन्हा मुदतवाढ