पुणे – एक हजार रुपयांच्या लाचेची मागणी करून तडजोडीअंती आठशे रुपयांची लाच घेताना धनकवडी येथील महावितरणच्या उपविभागिय कार्यालयातील एका प्रशिक्षणार्थी कर्मचार्‍याला लाचलुचपत प्रतिबंधक विभागाने सापळा रचून रंगेहात पकडले.

आशिष ज्ञानोबा क्षीरसागर (वय 25) असे त्याचे नाव आहे. याप्रकरणी, 44 वर्षीय तक्रारदाराने दिलेल्या तक्रारीनुसार सहकारनगर पोलिसांनी क्षीरसागर याच्या विरुद्ध भ्रष्टाचार प्रतिबंधक अधिनियमानुसार गुन्हा दाखल केला आहे.

तक्रारदार यांनी त्यांच्या आईच्या नावावर एक सदनिका खरेदी केली आहे. त्याच्यावर पुर्वीच्या मालकाचे नाव होते. त्याच्यावर त्यांच्या आईचे नाव लावून देण्यासाठी, तसेच याबाबतची कागदपत्रे महावितरणच्या संकेतस्थळावर अपलोड करून देण्यासाठी क्षीरसागर याने तक्रारदाराकडे एक हजार रुपयांच्या लाचेची मागणी केली होती.

तडजोडीअंती आठशे रुपयांत काम करण्याचे ठरले. याबाबत 14 नोव्हेंबर रोजी तक्रारदाराने लाचलुचपत विभागाकडे तक्रार दिली होती. पडताळणी केली असता, क्षीरसागर याने लाच मागितल्याचे निष्पन्न झाले.

मंगळवारी (दि.19) धनकवडी येथील महावितरणच्या उपविभागीय कार्यालयात सापळा रचून क्षीरसागर याला आठशे रुपयांची लाच घेताना रंगेहाथ पकडण्यात आले. पुढील तपास पोलिस निरीक्षक प्रसाद लोणारे करीत आहेत. ही कामगिरी पोलिस अधीक्षक शिरीष सरदेशपांडे यांच्या मार्गदर्शनाखाली पथकाने केली.