पुणे : घरगुती गॅस सिलिंडरचा साठा करून त्याची अवैधरित्या सुरू असलेली विक्री सिंहगड रस्ता पोलिसाच्या पथकाने उघडकीस आणली. गॅसचा काळाबाजार करणार्‍या एकाला अटक करून त्याच्याकडून टेम्पोसह ६१ गॅसच्या टाक्या जप्त करण्यात आल्या आहेत.

विकास धोंडाप्पा आकळे (३१, रा. चरवड वस्ती, वडगाव बुद्रूक, मूळ रा. सोलापूर) असे अटक करण्यात आलेल्याचे नाव आहे. आकळे याच्यावर दोन महिन्यांपूर्वी देखील अशीच कारवाई करण्यात आली होती.

सिंहगड रस्ता पोलीस ठाण्याचे पथक हद्दीत गस्तीवर होते. त्यादरम्यान वडगाव बुद्रूक भागात एकाने अवैधरित्या सिलिंडरचा साठा केला असून त्याची चोरून विक्री करीत असल्याची माहिती पथकाला मिळाली. त्यानुसार पथकाने छापा टाकला. तेथील टेम्पोमध्ये सिलिंडर्स आढळून आले.

वरिष्ठ पोलीस निरीक्षक दिलीप दाईंगडे, गुन्हे निरीक्षक उत्तम भजनावळे यांच्या मार्गदर्शनाखाली सहायक निरीक्षक सचिन निकम, उपनिरीक्षक संतोष भांडवलकर, अंमलदार संजय शिंदे, आण्णा केकाण, उत्तम तारू यांच्यासह पथकाने ही कामगिरी केली.