उपमुख्यमंत्री फडणवीस : शिबिरात 8,197 रक्‍तपिशव्या संकलित
माजी महापौर मुरलीधर मोहोळ यांच्यातर्फे ‘रक्‍तदान महासंकल्प’

पुणे – “वाढदिवस साजरा करताना लोकोपयोगी उपक्रम राबवणे हे अत्यंत महत्त्वाचे आहे. कारण, आपण समाजासाठी जीवन वाहून दिलेले असते. त्यामुळे वाढदिवसानिमित्त रक्‍तदान शिबिर आयोजित करणे, ही चांगली संकल्पना आहे,’ अशा शब्दांत उपमुख्यमंत्री देवेंद्र फडणवीस यांनी रक्तदान महासंकल्प दिवसानिमित्त आयोजित रक्‍तदान शिबिर उपक्रमाचे कौतुक केले. यावेळी त्यांनी भाजप प्रदेश सरचिटणीस आणि माजी महापौर मुरलीधर मोहोळ यांना वाढदिवसाच्या शुभेच्छा दिल्या.

या उपक्रमात यंदा एकूण 8 हजार 197 रक्‍त पिशव्या संकलित झाल्या. “रक्तदान महासंकल्प’ दिवसाचे यंदा चौथे वर्ष होते.
संस्कृती प्रतिष्ठानच्या वतीने आयोजित रक्‍तदान शिबिरात उपमुख्यमंत्री फडणवीस यांनी भेट दिली. यावेळी त्यांनी काही रक्‍तदात्यांशी संवाद साधत मोहोळ यांचा अभीष्टचिंतनपर सत्कार केला.

फडणवीस म्हणाले, “जीवनदान देण्यासाठी रक्‍ताची अतिशय गरज असते. आपल्याकडे अनेक वेळा रक्‍तपुरवठा अपुरा असतो आणि रक्‍तदाते शोधावे लागतात म्हणूनच हे शिबिर अत्यंत महत्त्वाचे आहे. गरजूंसाठी रक्‍ताचा साठा उपलब्ध करून देण्यासाठी शिबिराचे आयोजन गरजेचे आहे.’

मोहोळ म्हणाले, “वाढदिवस विधायक आणि सामाजिक उपक्रमाने साजरा व्हावा, याची प्रेरणा उपमुख्यमंत्री देवेंद्र फडणवीस यांच्याकडून मिळाली. कोविड काळात अत्यंत निकडीच्या काळात सुरू झालेल्या रक्‍तदान शिबिराला आता लोकचळवळीचे स्वरुप प्राप्त होत आहे. ही निश्‍चितच समाधानाची बाब आहे. सार्वजनिक आणि राजकीय जीवनात काम करणाऱ्यांना माझे आवाहन आहे, की पुणे शहरातील रक्‍ताचा तुटवडा लक्षात घेता रक्‍तदान शिबिरांचे आयोजन केले जावे.’