Pune Airport – अमेरिका-इस्त्रायलच्या हल्ल्यानंतर इराणने अबुधाबी, युईए, बहरीन आणि कुवेतमदील अमेरिकन लष्करी तळांवर हल्ले केल्याने तेथील विमानतळ बंद केले आहे. यामुळे पुण्यातून दुबई, अबुधाबीला जाणारी आंतरराष्ट्रीय उड्डाणे शनिवारी (दि. २८) रात्रीपासून रद्द केली आहेत. आज (दि. १) दोन विमानसेवाही रद्द केल्या असून पुढील सूचनेपर्यंत दुबई, अबुधाबीची विमानसेवा बंद राहणार असल्याचे विमानतळ प्रशासनाकडून सांगण्यात आले. मध्य पुर्वेतील हवाई क्षेत्र बंद झाले असून, सुरक्षिततेसाठी मध्यपूर्व अशियात जाणाऱ्या विमानांची उड्डाणे रद्द केली आहेत. इराण, इस्त्रायल, इराक, कुवेत, कतार, यूएई आदी देशांनी हवाई क्षेत्र बंद केल्याने या हवाई हद्दीतून मुंबई, दिल्लीमार्गे येणारी विमानेही स्थगित झाली आहेत. ज्या प्रवाशांनी आगाऊ आरक्षण केले आहे, त्यांनी वेबसाईटवर सूचना पाहाव्या असे पुणे विमानतळाचे संचालक संतोष ढोके यांनी सांगितले. दरम्यान, शनिवारी रात्री दुबईचे प्रवाशी विमानतळावर आल्यावर विमानसेवा रद्द झाल्याचे समजले. त्यामुळे काहीवेळ गोंधळाचे वातावरण होते. मात्र, सुरक्षिततेच्या दृष्टीने ही सेवा बंद केल्याचे समजल्यावर प्रवाशी घरी गेले. जे प्रवाशी पर्यटन किंवा व्यावसायानिमित्त पुण्यात आले होते. त्यांना अडकून रहावे लागले. पुण्यातून काही ग्रुप, कुटुंब पर्यटन, शिक्षण सहल नातेवाईकांना भेटण्यासाठी दुबई, अबुधाबीला गेले आहेत. दुबईतील विमानतळ बंद केल्यामुळे तेथील प्रवाशांमध्ये भितीचे वातावरण आहे. विमान सेवा सुरू कधी होणार याबाबत वारंवार विचारणा केली जात असून, वैयक्तीक खर्च करून गेलेल्या प्रवाशांसमोर रहायचे कोठे यापासून आर्थिक प्रश्न उभा राहिला आहे. ग्रुपने गेलेल्या प्रवाशांची व्यवस्था तात्पुरती करण्यात आली आहे. “२४ फेब्रुवारीला दहा जणांचा ग्रुप दुबईला आला. शनिवारी मध्यरात्री १२ वाजून ५ मि. दुबई-पुणे विमानसेवा होती. मात्र, विमानतळावर गेल्यावर विमानतळ बंद केल्याचे सांगितले. आम्ही हाॅटेल सोडले होते. त्यात हल्ल्याची माहिती समजल्यावर आता करायचे काय ? असा प्रश्न उपस्थित झाला. त्यावेळी उपमुख्यमंत्री एकनाथ शिंदे यांना ही माहिती सजल्यावर त्यांनी संपर्क साधून संवाद साधला आणि आम्हाला सहकार्य केले.” – किशोर कुलकर्णी – प्रवाशी