परभणी (ज्ञानेश्वर फड) – महाराष्ट्र लोकसेवा आयोगामार्फत (MPSC) घेण्यात आलेल्या मर्यादित विभागीय पोलीस उपनिरीक्षक (PSI) परीक्षा २०२३ चा तात्पुरता निवड निकाल ३० एप्रिल २०२६ रोजी जाहीर झाला आहे. या परीक्षेत परभणी जिल्ह्यातील गंगाखेड तालुक्यातील खादगाव येथील सुपुत्र हनुमान शिवाजी शिंदे यांने घवघवीत यश संपादन करत पोलीस उपनिरीक्षक पदाला गवसणी घातली आहे. त्याने ४०० पैकी ३६२ गुण मिळवून सर्वसाधारण गुणवत्ता यादीत १७० वा क्रमांक पटकावला आहे. (PSI Hanuman Shinde) शेतकऱ्याच्या मुलाची गरुडझेप – हनुमान याचे आई-वडील शेतीमध्ये कष्ट करून आपल्या कुटुंबाचा उदरनिर्वाह करतात. अत्यंत प्रतिकूल परिस्थितीत त्यांनी मुलाच्या शिक्षणासाठी जिवापाड मेहनत घेतली. हनुमानचे प्राथमिक शिक्षण खादगाव येथील जिल्हा परिषद शाळेत झाले, तर पुढील उच्च शिक्षण त्यांनी लातूर येथील दयानंद महाविद्यालयात पूर्ण केले. आई-वडिलांच्या कष्टाचे चीज करत हनुमानने आज हे मोठे यश मिळवून गावाचे नाव उज्ज्वल केले आहे. ‘खाकी’तील प्रवासाला नवे वळण – हनुमान शिंदे याची १९ जुलै २०१७ रोजी मुंबई येथील राज्य राखीव पोलीस दलात (SRPF) निवड झाली होती. पोलीस दलात सेवा बजावत असतानाच त्याने वरिष्ठ पदावर जाण्याचे स्वप्न उराशी बाळगले होते. कर्तव्यावर असतानाही अभ्यासातील सातत्य आणि प्रबळ इच्छाशक्तीच्या जोरावर त्याने एमपीएससीची ही विभागीय परीक्षा दिली. ६१५ जागांसाठी झालेल्या या अत्यंत चुरशीच्या परीक्षेत त्याने आपल्या जिद्दीच्या जोरावर पीएसआय पदापर्यंत मजल मारली आहे. सर्वत्र अभिनंदनाचा वर्षाव – हनुमानच्या निवडीचे वृत्त समजताच खादगावसह संपूर्ण गंगाखेड तालुक्यात आनंदाचे वातावरण पसरले आहे. एका सामान्य शेतकरी कुटुंबातील तरुणाने पोलीस उपनिरीक्षक पदापर्यंत मारलेली ही झेप ग्रामीण भागातील इतर विद्यार्थ्यांसाठी प्रेरणादायी ठरणार आहे. त्याच्या या यशाबद्दल गावकरी, मित्रपरिवार आणि पोलीस दलातील सहकाऱ्यांकडून त्याच्यावर अभिनंदनाचा वर्षाव होत आहे. ( MPSC Departmental PSI Final Result 2026)
