Shilpa Shetty । Raj Kundra – बॉलिवूड अभिनेत्री शिल्पा शेट्टी आणि तिचा पती राज कुंद्रा यांनी मनी लाँड्रिंग प्रकरणी उच्च न्यायालयात धाव घेतली आहे. मुंबईतील जुहू परिसरातील त्यांचे घर आणि पुण्‍यातील फार्महाऊस रिकामे करण्याची ईडीने नोटीस पाठवली होती.

आता ईडीच्या या नोटीसविरोधात शिल्पा शेट्टी आणि राज कुंद्रा यांनी उच्च न्यायालयात आव्‍हान दिले आहे. या याचिकेवर न्या. रेवती मोहिते-डेरे आणि न्‍या. पृथ्वीराज चव्हाण यांच्या खंडपीठासमोर आज सुनावणी पार पडली.

ही याचिका शिल्‍पा शेट्‌टी आणि राज कुंद्रा यांच्‍या वतीने ज्येष्ठ विधिज्ञ प्रशांत पाटील यांच्यामार्फत दाखल करण्यात आली होती. यानंतर न्यायालयाने ईडीला नोटीस बजावली असून गुरुवारी याचिकेवर पुढील सुनावणी निश्‍चित केली आहे.

कथित बिटकॉइन फसवणुकीशी संबंधित मनी लाँड्रिंग प्रकरणी शिल्‍पा शेट्टी आणि राज कुंद्रा यांना 27 सप्टेंबर रोजी ईडीने नोटिस जारी केली होती.

यात कुंद्रा आणि त्यांच्या पत्नीला मुंबईतील निवासी घर आणि पुण्यातील फार्महाऊस 10 दिवसांच्या आत खाली करण्याचे निर्देश देण्यात आले आहेत. ईडीने त्यांना 3 ऑक्टोबर रोजी घराबाहेर काढण्याची नोटीस दिली होती.