ST Bus: खासगी वाहनचालक पळविताहेत एसटीचे प्रवासी; एसटीच्या विनंती थांब्यावर अवैध प्रवासी वाहतूक
एसटी प्रशासन आणि आरटीओचे दुर्लक्ष

पिंपरी – पिंपरी-चिंचवडमधील प्रवाशांसाठी महामार्गावर असलेल्या भूमकर चौकातील एसटीच्या विनंती थांब्यावर प्रवासी वाहतूक करणाऱ्या खासगी वाहनचालकांकडून सर्रास एसटीचे प्रवासी पळविले जात आहेत.
एसटी बसची वाट पाहणाऱ्या प्रवाशांना लक्ष्य करून खासगी वाहने आणि परराज्यातील बसगाड्या प्रवासी घेऊन जात असल्याने एसटी महामंडळाच्या उत्पन्नावर परिणाम होत आहे. मात्र, या प्रकाराला आळा घालण्यासाठी एसटी प्रशासनाकडून कर्मचारी नियुक्ती किंवा आरटीओ कडून ठोस कारवाई होत नसल्याने प्रवाशांमध्ये नाराजी आहे.
भूमकर चौक नावाने ओळखल्या जाणाऱ्या अण्णा इडलीसमोर, जिंजर हॉटेलजवळ एसटीचा विनंती थांबा आहे. या ठिकाणी शेकडो प्रवासी विविध शहरांकडे जाणाऱ्या एसटी बसची वाट पाहत उभे असतात. मात्र, थांब्याच्या परिसरात खासगी वाहने आणि अन्य राज्यांतील बसगाड्यांची गर्दी होत आहे. मुख्य महामार्गावरच वाहने थांबवून प्रवाशांना बसविण्याचा प्रकार सुरू असल्याने एसटीच्या प्रवाशांची गैरसोय होत आहे.
एसटी बसची वाट पाहणाऱ्या प्रवाशांना खासगी वाहनचालकांकडून आवाज देऊन प्रवासासाठी बोलावले जाते. अनेकदा प्रवाशांना त्यांच्या इच्छित स्थळी जाण्यासाठी खासगी वाहनांचा पर्याय उपलब्ध करून दिला जातो.
त्यामुळे एसटीच्या थांब्यावरून प्रवासी खासगी वाहनांकडे वळत असल्याचे चित्र आहे. या प्रकारामुळे एसटी महामंडळाच्या प्रवासी वाहतुकीला स्पर्धा निर्माण होत असतानाच, खासगी वाहनांच्या बेकायदा थांब्यांमुळे महामार्गावरील वाहतुकीलाही अडथळा निर्माण होत आहे.
या ठिकाणी एसटी प्रशासनाकडून नियमित कर्मचारी नेमण्यात आलेले नाहीत. त्यामुळे थांब्यावर प्रवाशांची गर्दी, खासगी वाहनांची वर्दळ आणि वाहतूक कोंडी यावर नियंत्रण ठेवणारी यंत्रणा दिसत नाही.
आरटीओकडूनही या परिसरात अवैध प्रवासी वाहतुकीवर कारवाई होत नसल्याने खासगी वाहनचालकांचे फावले आहे. महामार्गावर एसटीची वाट पाहणाऱ्या प्रवाशांना सुरक्षित ठिकाणी उभे राहण्याची सुविधा नसल्याने जीव धोक्यात घालून बसची प्रतीक्षा करावी लागत आहे.
मुंबईकडे जाणाऱ्या एसटी बसही इंदिरा युनिव्हर्सिटीच्या पुढे मुख्य महामार्गावर थांबतात. यापूर्वी या ठिकाणी एसटीची केबिन उभारून कर्मचारी नियुक्त करण्यात आले होते. मात्र, आता ही व्यवस्था बंद झाली असून केबिन आणि कर्मचारी दोन्ही गायब झाले आहेत. त्यामुळे प्रवाशांना मार्गदर्शन करणारी किंवा थांब्यावर नियंत्रण ठेवणारी यंत्रणा उरलेली नाही.
‘भूमकर चौकातील एसटीच्या विनंती थांब्यावर केबिन उभारून नियमित कर्मचारी नियुक्त करावेत, तसेच महामार्गावर होणारी अवैध प्रवासी वाहतूक रोखण्यासाठी एसटी महामंडळ आणि आरटीओने संयुक्त कारवाई करावी. प्रवाशांची सुरक्षितता आणि एसटीच्या अधिकृत प्रवासी वाहतुकीचे संरक्षण करण्यासाठी प्रशासनाने तातडीने लक्ष द्यावे.’- बाबू फिलीप डिसोजा कुमठेकर, स्थानिक नागरिक
NCP News: अजितदादा विमान अपघात चौकशीतील दिरंगाईवरून राष्ट्रवादी आक्रमक





