मुंबई: रॉयल चॅलेंजर्स बंगळुरू (आरसीबी) चा स्टार यष्टीरक्षक-फलंदाज जितेश शर्मा याने देशांतर्गत क्रिकेटमध्ये विदर्भ सोडून बडोद्याकडून खेळण्याचा महत्त्वाचा निर्णय घेतला आहे. 31 वर्षीय जितेशने 2015 पासून विदर्भाचे प्रतिनिधित्व केले होते, पण आता तो 2025-26 हंगामात बडोद्याकडून खेळताना दिसेल. या बदलामुळे त्याला प्रथम श्रेणी क्रिकेटमध्ये आपली कारकीर्द पुन्हा रुळावर आणण्याची संधी मिळेल, अशी आशा आहे. बडोद्याकडून नवीन सुरुवात जितेश शर्माला विदर्भाकडून रणजी ट्रॉफीमध्ये संधी मिळणे कठीण झाले होते, कारण संघाचा कर्णधार अक्षय वाडकर हा स्वतः यष्टीरक्षक आहे. यामुळे जितेशला बराच काळ बेंचवर बसावे लागले. 2024-25 हंगामात त्याला एकही रणजी सामना खेळता आला नाही. क्रिकइन्फोनुसार, बडोद्याचा कर्णधार कृणाल पंड्याशी असलेल्या चांगल्या संबंधांमुळे आणि गेल्या काही काळापासून सुरू असलेल्या नियोजनामुळे जितेशने हा निर्णय घेतला. दोघेही आयपीएल 2025 मध्ये आरसीबीकडून एकत्र खेळले होते. प्रथम श्रेणीतील आव्हान, टी20 मधील चमक जितेशने 2015-16 मध्ये विदर्भाकडून पदार्पण केल्यानंतर केवळ 18 प्रथम श्रेणी सामने खेळले असून, त्याची सरासरी 24.48 आहे. यात त्याने चार अर्धशतके झळकावली. तो शेवटचा रेड-बॉल सामना 18 महिन्यांपूर्वी खेळला होता. तर दुसरीकडे, टी20 क्रिकेटमध्ये जितेश एक उत्कृष्ट फिनिशर म्हणून ओळखला जातो. 2023 मध्ये पंजाब किंग्जसाठी त्याने दमदार कामगिरी केली, तर आयपीएल 2025 मध्ये आरसीबीसाठी फिनिशरची भूमिका बजावत संघाला विजेतेपद मिळवून देण्यात मोलाचा वाटा उचलला. रजत पाटीदारच्या अनुपस्थितीत त्याने आरसीबीच्या संघाचे नेतृत्वही केले होते. भारतासाठी योगदान जितेशने भारतासाठी 9 टी20 सामने खेळले असून, पांढऱ्या चेंडूच्या क्रिकेटमध्ये त्याची कामगिरी उल्लेखनीय आहे. बडोद्याकडून खेळण्याचा निर्णय त्याच्या प्रथम श्रेणी कारकीर्दीला नवसंजीवनी देईल, अशी अपेक्षा आहे. जितेश शर्माही नव्या आव्हानांना सामोरे जाण्यासाठी सज्ज आहे.
