नवी दिल्ली : पंतप्रधान नरेंद्र मोदी यांनी आज (२१ सप्टेंबर २०२५) राष्ट्राला संबोधित करताना ‘नेक्स्ट जनरेशन जीएसटी’ सुधारणांना ‘जीएसटी बचत उत्सव’ म्हणून घोषित केले. या सुधारणांमुळे गरीब आणि मध्यमवर्गीय कुटुंबांना घर बांधणे, टीव्ही, फ्रीज, बाईक सारख्या वस्तू खरेदी करणे आणि प्रवास करणे आता परवडणारे होणार आहे, असं ते म्हणाले.

नव्या जीएसटी दरांमुळे दैनंदिन वस्तू, औषधे, हॉटेल राहणी आणि वाहन खरेदी स्वस्त होईल, ज्यामुळे ‘नागरिक देवो भव’ या मंत्राची खरी अंमलबजावणी होईल, असं पंतप्रधान मोदी यांनी सांगितले.

नरेंद्र मोदी म्हणाले, “गेल्या ११ वर्षांत २५ कोटी लोक गरीबीमुक्त झाले आणि ‘नियो-मध्यमवर्ग’मध्ये सामील झाले. त्यांच्या स्वप्नांना पंख देण्यासाठी आम्ही १२ लाख रुपयांपर्यंत उत्पन्न करमुक्त केला आहे. आता जीएसटी सुधारणांमुळे दैनंदिन वस्तू, प्रवास आणि हॉटेल राहणी स्वस्त होईल. हे गरीब, मध्यमवर्ग, शेतकरी, महिला, विद्यार्थी आणि युवकांसाठी ‘डबल बोनान्झा’ आहे.” या बदलांमुळे लोकांना २.५ लाख कोटी रुपयांची बचत होईल, असं त्यांनी सांगितले.

हे नवे दर उद्या (२२ सप्टेंबर) पासून, म्हणजे नवरात्र सुरू होताच लागू होतील. मोदी म्हणाले, “मातृशक्तीशी निगडित असलेल्या या सुधारणांमुळे स्वदेशी भारताकडे मोठा टप्पा साध्य होईल.”