नवी दिल्ली – भारताचे पंतप्रधान नरेंद्र मोदी लवकरच अमेरिकेच्या दौऱ्यावर जाणार आहेत. अशा परिस्थितीत दोन्ही देशांमधील संबंध आणखी दृढ करण्याच्या दृष्टीने पावले टाकली जाणार आहेत. अमेरिकी स्टेट डिपार्टमेंटच्या एका वरिष्ठ अधिकाऱ्याने सांगितले की, पंतप्रधान मोदींच्या अमेरिका दौऱ्यामुळे, दोन्ही देशाच्या नेत्यांना दोन सर्वात मोठ्या लोकशाहीमधील सखोल सलोख्याचे संबंध अधोरेखित करण्याची एक उत्तम संधी आहे.

विशेष म्हणजे राष्ट्राध्यक्ष जो बायडेन यांच्या निमंत्रणावरून पंतप्रधान मोदी पुढील महिन्यात अमेरिकेला जाणार आहेत. तेथे ते 22 जून रोजी अमेरिकेचे राष्ट्राध्यक्ष आणि फर्स्ट लेडी जिल बायडेन यांच्यासोबत स्टेट डिनर घेणार आहेत. दक्षिण आणि मध्य आशियाच्या उप सहाय्यक सचिव नॅन्सी एझो जॅक्‍सन सांगतात की, पंतप्रधान मोदींच्या स्वागतासाठी अमेरिकन सरकार उत्सुक आहे.

आता दोन्ही नेत्यांना भारत आणि अमेरिका यांच्यातील सखोल संबंध अधोरेखित करण्याची उत्तम संधी आहे. याप्रसंगी दोन्ही नेते वाढता व्यापार, गुंतवणूक आणि संरक्षण भागीदारीचा आढावा घेतील, असे नॅन्सी म्हणाल्या. आरोग्य, हवामान बदल, स्वच्छ ऊर्जा तंत्रज्ञान आणि अन्न सुरक्षा यासारख्या जागतिक आव्हानांना तोंड देण्यासाठी दोन्ही देश एकत्र काम करत असल्याने सहकार्याच्या नवीन क्षेत्रांवर चर्चा करणे अपेक्षित आहे.

दोन्ही नेत्यांच्या भेटीत अनेक मुद्द्यांवर चर्चा होणार असल्याचे नॅन्सी जॅक्‍सन यांनी सांगितले. दोन्ही देशांतील लोकांची संयुक्त गुंतवणूक असो, शिक्षण क्षेत्र असो की व्हिसा, प्रत्येक महत्त्वाचा मुद्दा दोन राष्ट्रप्रमुखांमधील चर्चेचा भाग असेल.

संरक्षण सज्जताही महत्त्वाची…
पेंटागॉनचे प्रवक्ते एरिक पहन म्हणाले की, दोन्ही अधिकाऱ्यांनी संरक्षण उत्पादन सहकार्य आणि ऑपरेशनल भागीदारीसह भारत-अमेरिका संबंध मजबूत करण्यावर चर्चा केली. अमेरिकेचे संरक्षण सचिव हिक्‍स म्हणाले की, हिंद प्रशांत महासागर क्षेत्रात शांतता आणि समृद्धी राखण्यासाठी भारत आणि अमेरिका यांच्यातील मैत्री अत्यंत महत्त्वाची आहे. त्यामुळेच दोन्ही देशांमध्ये लष्करी, तांत्रिक सहकार्य वाढत आहे. मोदी-बायडेन भेटीत यावर अधिक निर्णय होणे अपेक्षित आहे.